La Usc di Ladins

L’à lurà fin inant Nadal, e enceben la festa fata con le autre maestre e con Romana Canal, ence ela ruada a la fin de so percors profescional, demò do Pasca Tofania, canche le scoline à endò avert si ujes, la se à rendù cont dalbon che no l era stat demò valch dì de festa, ma che no la fossa più jita duc i dis te la scolina de Sèn Jan, olache i bec la spetaa... Enlauta più che na lagrema ge é slizià ju per le massele. L é senester meter de colp te na crigna beleche 42 egn de vita, de lurier fat con pascion, de recorc de centenees de picoi musc con eies da bricon e valch marisela... 

»Son pa jà jita via a i troar!« L é la pruma roba che la me disc, canche vae a me far contar valch de chisc egn. »Canche aon fat l recital da Nadal aee l magon a pissar che l era l ultim. Sperae che le maestre no le lo dijesse fora dedant a duc i bec e i genitores. Fosse stata mingol en dificoltà, ence percheche n muie de chi genitores che i era ló per la festa de si picioi l era stat mi scolees e gio me i vedee dedant amò picoi... l era jà da mingol de egn che aea scomenzà a me ruar i fies de chi che aee abù te scolina. Ge dijee: sasto che ence to papà l vegnia con me a scolina?« Valch outa ge mosciae ence le foto.

Podede lejer duta l'intervista su La Usc stampèda de en vender ai 31 de jené.  (Lucia Gross)