La Usc di Ladins

Ai 8 e 9 de firé Fascia sarà teater de la garejèdes de Copa del Mond de skicross, che vegnarà endrezèdes per la pruma outa sul portoi Monzoni, senta ofizièla di arcedamenc de la nazionèla talièna de ski cross. Do la garejèdes de Copa Europa di ultimes egn, l portoi é stat dut renovà e adatà a la competizions de maor livel mondièl.
A proèr neif e portoi l é stat i atlec de la nazionèla, che i à sotrissà la fortuna per la squadra talièna de poder aer n scito de arcedament vejin. Sun duc Simone Deromedis, trentin clas 2000 che l é al secondo post te la classifica generèla de Copa del Mond.
Dut l staff de tecnics e organisadores é do a fenir i ultimes detaes, con la regia da la sozietà Gregn Evenc e la colaborazion de la Monti Pallidi e de l’autra doi sozietèdes de schi de val, Ski Team Fascia e FassActive. L portoi de gara é stat endrezà da la sozietà de impianc portamont Catinaccio, col builder Tobia Silvestri, l responsabol de percors Dario Dellantonio e l diretor de gara Andreas Krautgasser con apede Mattia Giongo e l program de la competizions é stat prejentà da la sozietà Gregn Evenc de Fascia, con sie president Fausto Lorenz, en mèrtesc ai 28 de jené a Trent te la senta de l’Itas Mutua.

De più su La Usc stampèda de en vender ai 31 de jené.  (LG)