La Usc di Ladins

Ciodí vëgn mo na delegaziun dal’Uganda a Al Plan a s’informé sön le turism? Ci liëia mo le turism amez les savanes, i gragn predaturs y le bosch fluvial, cun les Dolomites olache an vá cun la roda, a crëp y cui schi? Chëstes é döes domandes che i m’á fat danter me, canche la Cooperativa Turistica m’â informé de chësta incuntada informala, che é spo gnüda a s’al dé en mercui ai 22 de jená. La resposta stá te n conzet che vel o che messass valëi sura döt le monn: n turism sostenibl, che tol ite y ciara ince dla jënt dl post. Propi de chësc nen jôra pro la incuntada, olache le diretur dla CT Carlo Runggaldier y le colaboradú Filippo De Agostini á podü saludé la professuria Linda Osti dla Bangor University dl Wales, che á acompagné alerch le grup ugandesc.

Baié de delegaziun pó ester n pü’ vaghé, deache al n’é nia rové adalerch rapresentanzes de govern o istituzionales, mo scemplamënter porsones studiades y ingajades che oress slarié te so paisc l’idea de n turism che ciara deplü de süa jënt. Jalia Nabukalu Pack y Eileen Walusimbi Oloya á intrames studié strategies de sostenibilité; la pröma inrësc tla Bangor University, la secunda é direturia dla Linkit Sustainability Initiative tl’Uganda. Meddie Mutyaba é assistënt pro la medema iniziativa y fej deperpo ince la guida turistica ti parcs ugandesc. Ala pert pro la mësa torona êl ince Matteo Rubatscher dla Ciasa dl parch a Al Plan, Tanja Ploner dla IDM y le professur Massimo Morellato dla Université Lëdia de Balsan.

Ci esperiënzes che an s’á baraté fora, podëise lí do t’La Usc di Ladins di 31 de jená  (pablo)