La Usc di Ladins

Ncuei sciche ncuei mostra la SVP si drë' mus. La ne ti va bele giut nia plu de valores, la ti va mé de nteresc. L vën rujenà de n "pat cun l diaul" y tl medemo mumënt uelen fé crëier che propi l partit dla SVP dëssa vester l garant per nosc valores. Ma na garanzia adròven mé canche velch ie melsegur, canche n se tëm bele danora che velch vede stort, che l ne vënie nia tenì ite cie che vën fat ora, che l vënie trapulà. Ulache l ie trasparënza y condivijion de valores ne adròven mia no na garanzia!
Nëus Ladins son na mendranza tla mendranza, per nëus ie n partit nazionalist dai valores post-fascisć che rejona de nazion y de sovranità naziunela n pricul. Man drëta resta man drëta. Post-fascist resta post-fascist. Iló ne jova ënghenó n catalogh de valores scric ju sun na zedula coche la SVP uel ti lascé firmé ai partner de coalizion. Tl mumënt te chël che la SVP miena de pudëi adurvé i post-fascisć per si nteresc, devëntela si sustenidëura ti judan a ruvé permez al pudëi.
Truepa jënt ie grama, cun rejon! Na scumenciadiva dla populazion à metù a jì n muvimënt de prutesta publica, "No excuses" – deguna viertles – che à bele abinà adum truep sustenidëures danter personajes politics coche Oskar Peterlini, Hans Heiss y Albert Pürgstaller, ma nce danter nteletuei, persones de cultura, de scienza y de religion, coche Georg Kaser, Elsbeth Wallnöfer, Don Paul Renner. Śën iel l mumënt de mustré y lascé audì si ndiniazion! Duta chëla jënt che te chisc ani ti à cherdù ala paroles de nosc presidënt dla Provinzia che parcundiva strategies de sustenibltà y de inuvazion soziela, vën ncuei tradida. Śën iel l mumënt de lascé audì la ujes de prutesta ajache ne ulon degun "pat cun l diaul", ma ulon n guviern provinziel che scona nosta mendranzes y che ti cëla al daunì tl respet dla persona zënza descriminazion
L ie situazions tla vita ulache l ie drët jì ite cumpromisc. N guviern cun n partit post-fascist ne ie degun cumpromis, l ie na umiliazion y n falimënt politich. (Lëtra de Elide Mussner, Badia)