La Usc di Ladins

Peste te prejentèr?
Son Sara Desilvestro, stae a Ciampestrin, é 30 egn. Apede al lurier te ofize skipass de la Ciampac, che tegne amò ence ades d’invern, dal 2020 con mie om Fabio é avert na picola azienda che à inom N’Outa.

Che fajede?
Fajon coltivazion, regoeta e tra­sformazion. Aon trei ciampes, duc a Ciampestrin, presciapech 2.000 metres cadrac. Meton ju sièla, orc e formenton, coltivon lin da tessidura e dapò aon dute le sort de erbe da saores che lascion jir a fior per la eves, sion ence arlevaeves. Fajon regoeta spontana per enjignar sciropes de baranchie, de zirm, de fior de zucoria, fajon marmelade, liquores e con l orc fajon cafè. Duron na sort de camamilia che crescea te ort de mia giava per fèr n liquor. Vardon de durèr dut semenzes autoctones. Duron ence na pèrt de la smielatura di opercoles per meter en infujion e fèr na sort de sgnapa descheche fajea nesc veies, per no perder chesta pèrt che la é amò rica de saores.

Èste emparà ence a tescer l lin?
L lin l majeree e l enjigne per filèr. É fat n cors de filèr e de tescer con na femena de Ègort che la se à metù a la leta per ne ensegnèr a mi e mia jormèna. Fajon dut robes per nos, ela me à regalà n fil de cèneva de la fin del Otcent che l’à troà sun sotcuert, gé me é portà mie fil de lin che é encolorì con colores de fiores che coltivon nos, é mescedà dut con na lèna de Lamon. Me piajessa portèr inant chesta cultura de tescer che la é jita a se perder. (Intervista de Monica Cigolla)

De plu tla edizion stampeda de La Usc di Ladins o sun l e-paper a paiament www.lausc.it/e-paper