La Usc di Ladins

La valorisazion del teritorie de la Dolomites travers la cultura e la formazion artistica l é un di obietives de la sociazion ‘Le Muse e le Dolomiti’. Per arjonjer chest travert la se dèsc ju soraldut te doi sorts de atività: l endrez de conzerc e spetacoi e per ge dèr na oferta formativa al teritorie. La vijion de la sociazion, vidèda da la presidenta e maestra Oda Zoe Hochscheid, l é chela de fèr su penc anter l mond amatorièl e chel profescionèl e per chest i doi pilèstres de ‘spetacoi’ e ‘formazion’ se tegn su un col auter. 
Per chel che vèrda Fascia la senta la é te la sala Simonin Maza de Moena, na sala bela grana e lumenousa, olache l é a la leta ence n pianofort. Proprio te chesta senta via per dut l meis de otober la scola met dant lezions de proa debant per na dì en setemèna, de mèrtesc domesdì.
Per se scriver ite a la Scola Interregionèla no l é de besegn de aer cognoscenzes musicales: pel proèr duc i bec e joegn. Info sul sit www.musedolomiti.it o da la maestra Oda Zoe Hochscheid al numer 342 9147711.

De più su La Usc stampèda de en vender ai 11 de otober.

 (Monica Cigolla)