La Usc di Ladins

Acà 7 egn nascea te Fascia l grop Circensema, con chela de portèr l’èrt del circo ence te noscia comunanza, olache de jogolieres e acrobac se rejonèa da chièr, demò canche ruèa vèlch compagnia fora per la sajon da d’istà con sie tendon. 

Soraldut de gra al empegn di jomelins Martin e Thomas Pederiva e col didament de la Coprativa sozièla Inout, l grop de joegn jogolieres de Fascia l se à man a man smaorà, l é cresciù dal pont de veduda tecnich e l à tout ite fenc e touses de talent, che ti egn i à emparà n muion de cunsć e a se mever con ardiment sun paladina. 

Anchecondì, do n bel toch de strèda ensema e col emportant didament de la regista Michela Marangoni e de la Scola de circo »Bolla di Sapone« da Trent, Circensema l é doventà na realtà artistica emportanta, bona de portèr sia legreza e energia te la piazes de noscia valèdes e ence più dalonc, da spes fora per l Trentin e foradecà. 

Apede ai jomelins Pederiva, tel grop l é Ax, Nico, Dani, Luli, Teto, Andreas e Duda, con ence Bea che se jonta ite per dèr so contribut de legreza e gaissa. Giusć de 9, te n furgon i jogolieres fascegn śira la Tèlia, da Maran a Roma, da Pieve Tesino enscin a Ala, ruan ti paijes, ma ence su per la monts, anter crestes e refuges. 

Da de jugn de chest an, Circensema porta dant so nef spetacol che à inom ‘Sunsom’, te chel che con prossaches e guanc da zacan i jogolieres fèsc na raida sa mont, con chela de ruèr apontin a piz.

De più te la Piata di Joegn de La Usc stampèda de en vender ai 26 de messèl.  (Thomas Zulian)