Ai 24 de lugio ie l prim ntervënt stat puech dan la nuef: la zentrela de Bulsan à mandà l joler a Corvara, ulache n’ambulanza che fova bele iló ova damandà aiut per n’ëila cun coliches. Ëila ie unida meneda cun l joler tl spedel de Persenon.
Daldò iel stai mo trëi ntervënc, duc tla Val Badia: tl Edelweisstal iesen jic a tò n ël dla Talia che se ova fat mel al jenodl. Plu tert iesen pona julei a tò n’ëila tumeda sun l troi che va dala utia Jimmi de viers de Sass Ciampac. Nce ëila àn menà tl spedel de Persenon. L terzo ntervënt àn fat per un dala roda che ie tumà sun l troi da rodes che va dala Capanna Trieste de viers de Corvara, se fajan dassënn mel a na sciabla. Cun na binda bendebò longia àn pudù tré tl joler l melcapità per l mené te spedel.
Ai 25 de lugio àn cherdà l Aiut Alpin a Urtijëi per n’emergënza sanitera – l pazient ie unì sëurandat a n’ambulanza dla Crëusc Blancia.
Riesc do à n’ambulanza dla Crëusc Blancia menà adalerch tla sënta a Puntives n’ëila cun problems al cuer. N ie julei limpea tl spedel de Bulsan.
De plu tla edizion stampeda de La Usc di Ladins o sun l e-paper a paiament www.lausc.it/e-paper
