La Usc di Ladins

Ai 11 e 12 de mèrz l é stat doi dis de garejèdes a Falciade per la Copa Tèlia Rode per endrez de Schi Club Val Biois adum col Ski College del Venet e de valuta FIS, su na neif n muie svelta.

En sabeda l é stat la garejèda individuèla a tecnica classica a chela che à tout pèrt 230 atletes e atlec ence foresć. L resultat ladin mior é vegnù da la eles, con la moenata Caterina Ganz de le Fiamme Gialle che se à vadagnà l prum post col temp de 22’29’’9, e la é stata più svelta de presciapech n menut respet a la doi americhènes Margie Freed e Alexandra Lawson ruèdes al 2° e 3° post.

Anter ic l più svelt sui 10 km con partenza a cronometer l é stat l finanzier furlan de Sapada Davide Graz, che col temp de 19’ 33’’2 l é stat bon de fèr miec che l moenat Giovanni Ticcò de le Fiamme Oro, ruà secondo con n destach de 26’’4. Sul terzo sciaier assolut n auter furlan, Giuseppe Montello del Eserzit da la Ciarnia, enveze per chel che vèrda i Under 23, dò da Graz e Ticcò l terzo post é stat arjont dal moenat Alessandro Chiocchetti de le Fiamme Gialle, 5° assolut con demò 2 centeisemes de destach da Martin Coradazzi del Eserzit.

En domenia i 12 de mèrz l é stat enveze la garejèda de 15 Km. a tecnica ledia a inseguiment e la soma di ponts de la doi garejèdes per i joegn aea valuta per la classifica del Memorial Ernesto Fenti, e chiò te la Gundersen se à fat onor ence i atlec del Ski & Ice College de Fascia: sun duc 5^ U20 Gloria Gabrielli e 4° U198 Luca Ferrari.

De più su La Usc stampèda de vender ai 17 de mèrz.  (Lucia Gross)