La Usc di Ladins

La bela neva é ades ofizièla: ai 14 e 15 de setember te Fascia vegnarà fat la pruma edizion di Campionac Mondiai de Enduro e E-enduro de Mountain Bike: n travert dassen emportant. 

La competizion de l’UCI (Union Cycliste Internationale) vegn metuda a jir aldò de la cordanza nasciuda l an passà adum con WBD (Warner Bros. Discovery) canche per la neva disciplines de enduro l é peà via la garejèdes de Copa del Mond. L Comitat de endrez di mondièi te noscia val, col Fassa Bike e l sostegn de APT e Comitat Gregn evenc, l é vidà da William Basilico, atlet fascian de mountain bike de che da egn se dèsc ju per portèr a Cianacei garejèdes internazionèles sui troes del Fassa Bike District, olache giusta acà n an l era stat endrezà la 5^ tapa de la UCI Enduro World Cup.

L é jà dal 2019 che noscia val ge dèsc alberch a garejèdes de Enduro, spezialità de resistenza sui troes adorc con la roda, che troa tel Fassa Bike District anter Ciampac, Belvedere e Col Rodela percorsc erc, lonc e senestres dassen adaté, che seghita a crescer per sporjer servijes e ativitèdes de livel semper maor e anchecondì l dombra 18 troes con livel de dificoltà desferent. Chisc percorsc se dejouc tel bosch e fora del bosch e i va ence sorafora i confins de val, sul tegnir del Selaronda, de gra al Dolomiti Super Summer e ai impianc de Fassa Lift.
La garejèdes dai 14 e 15 de setember met a la leta i titoi de Enduro de ic e de eles e de E-Enduro, con la e-bike, semper de ic e e de eles. 

William Basilico à dit de esser dassen stolz de poder organisèr chesta competizions.

De più su La Usc stampèda de en vender ai 28 de jugn.  (LG)