La Usc di Ladins

Inier tla garejada de Copa dl Monn sön la Gran Risa a La Ila á le svizer Marco Odermatt mostré n iade implü, che tl slalom lerch n’él nia da bate. Chësc é sté la cuinta devënta por Odermatt sön la Gran Risa y inant resta so le titul de campiun. Ince sce tl pröm tëmp a dominé é sté le croat Filip Zubčić, á chësc tla secunda pert messü fá lerch por le svizer Odermatt y s’acontenté dl cuarto post. Na garejada che á zënz’ater tigní i spetadus sön les spines cina ala fin y ince porté ala löm inoms manco conesciüs, sciöche chël dl franzesc Leo Anguenot, che cun süa prestaziun demorvëia y ma 85 zentejims deplü dl campiun Odermatt (2´31´´45) é sté bun da se alzé sö al secundo scalin dl podest, pian ia dala nona posiziun arjunta tl pröm tëmp. Defata s’á cualifiché por le terzo post le norvegesc Aleksander Steen Olsen.


Nia da püch n’é stada la prestaziun de Alex Vinatzer, che á tl secundo tëmp cun sbunf davagné zoruch na miú posiziun. Do avëi arjunt tl pröm tëmp le 24ejim plazamënt, n’é Vinatzer tl secundo tëmp por dî alalungia nia sté da sborlé jö dal tron. Scebëgn che al á messü tlafinada le zede al campiun, á chësta arpizada de classifica dala 24ejima al’otava posiziun, mostré che nia n'é pordü y che döt pó ciamó mudé, ince ma te püc secunc. (mo)