La Usc di Ladins

Sia posizion l ombolt Giulio Florian l la aea jà dita a na vida chièra chest uton, canche te Consei de Comun de Moena l era stat portà dant l mudament del Regolament di Polins de Fascia e l’aproazion del Regolament spezièl per ge consentir de vegnir endoté de èrmes. N Regolament che via per l istà era jà stat aproà a Cianacei, Ciampedel, Mazin e Soraga, enceben con desvalives dubies. 
Domanà fora enlouta sul fat che l Comun de Sèn Jan no aessa portà dant chest tem te sie Consei, Florian (cfr. La Usc nr 44 dai 8 de november 2024) l dijea: »Gio é dit sobito che no portaré te mie Consei l regolament per armar i Polins perché son stat de contra fin dal scomenz. I Polins i vegn touc su dai Comuns per esser al servije di sentadins, i cogn ge star do al trafich, presidiar le scole, vardar che no vegne fat intervenc fora norma, ge responer a chi che domana informazion e c.i., no cogn doventar i ‘sceriffi’ sul teritorie. No me sà giust che i cogne semper de più jir al post de Carabinieres e Polizia, i sarà ence sot organich, ma no l é i Comuns che cogn ressolver chest problem.«
La costion de armèr i Polins l é stat la gocia che à fat jir sorafora n vajol che aea jà tacà a se empienir da n trat. Defat semper te chela ocajion, l ombolt de Sèn Jan aea jontà ite: »En cont de la gestion soziada l é robe che no va ben, aon domanà che vegne troà valch soluzion, ma fin ades ensema no se é stac bogn. Per ejempie per mie cont la senta la cogn esser te mez a la val, e no voi dir per forza a Sèn Jan, va ben ence Mazin e per me l servije va fat ence fora de sajon e podassane l far ence con nesc Polins. Del 2019, canche é renovà la convenzion, aee metù dant 3 condizion: che l ofize sie semper avert, che le doi val laterale del Comun olache l é limitazion del trafich le posse vegnir controlade, e che posse aer mie Polin de referiment del Comun, che dapò l jirà a se confrontar con so Comandant. Se no l é possibol l far ensema, cognaron vardar de se i ressolver enstesc i problemes, aon jà rejonà de chest te Consei e sion do che valuton se jir fora da la gestion soziada.«
Coscita la é stata. La convenzion, che à regnèda 5 egn, la era stata aproèda la pruma outa a la fin del 2014 su spenta de Cristina Donei, enlouta Procuradora del Comun General de Fascia, e dapò renovèda del 2019 e la va fora apontin con la fin del 2024. 
Te la scontrèda del Consei de Comun chiamà ite en vender ai 20 de dezember, la proponeta de no la renovèr la é passèda con la stima a una de duta la maoranza. De contra demò Lara Battisti de la mendranza, l auter conseier de mendranza prejent, Sandro Mazzel, se à astegnù.
Do 10 egn donca sul vèrech per meter adum n servije de val se risia de jir en do. L ombolt Florian conferma che sia aministrazion no azeta de aer i polins armé, ajache la priorità l é sporjer n bon servije per duta la comunanza, sentadins e ghesć, servije che l Comun de Sèn Jan pel portèr inant con sie organich. Florian à dit che se podarà valutèr de fèr endodanef pèrt de na gestion sozièda, ma demò se la costions vegn dezidudes dantfora a na vida più chièra. 
Ades sarà donca da veder se la gestion sozièda e coordenèda di Polins de Fascia jirà inant demò con 5 Comuns, o se vegnarà troà na cordanza desferenta.

 (Lucia Gross)