N grop de 45 persones, fascegn da duta la val o leé da egn a Fascia, à tout pèrt dai 6 ai 11 de november al viac e pelegrinaje endrezà da don Andrea Malfatti ensema con don Luciano Mainini, che da na vita l vegn sun Tamion e l endreza pelegrinajes. N viac che à sapù meter adum a na vida fona e percacenta l aspet religious, peà via dantfora con l envit ai partezipanc a se enjignèr, con chel più laich de cognoscenza di lesc, de la storia e de la cultura del Portogal.
Pruma tapa la capitala Lisbona olache l grop, vidà da la brava Sofia che à compagnà i fascegn per duta la setemèna, à podù veder i lesc più segnificatives de chesta zità.
Do doi dis te la capitala, ai 8 l grop é peà via envers l nord, travers i lesc turistics de Estoril e Cascais, passan per Cabo da Roca, l pont più ozidentèl de l’Europa, batù dal vent atlantich, fin ai bie paijes medievai de Sintra e Obidos, per ruèr a Fatima. Chiò l grop di fascegn à podù tor pèrt da sera a na messa resservèda, portan a »Nossa Senhora« la pruma intenzions personèles e cheles de duc per la pèsc. Don Andrea endèna duta la messes à portà dant la reflescions de Papa Francesch e di joegn che à tout pèrt chest an a la Giornèdes Mondièles de la Joentù, dedichèdes apontin a la Madona, che é jita coran per responer al Angel, a Die che la chiamèa e a didèr Sènta Elisabeta, e semper l é stat preà per la pèsc te la Tera Sènta e te l’Ucraina, apede che per la intenzions de ogneun.
Endèna l viac Sofia ge à fat cognoscer al grop de fascegn n muie de etres aspec de la storia e de la cultura del Portogal.
De più su La Usc stampèda de en vender ai 17 de november del 2023 (Lucia Gross)
N viac de devozion e cognoscenza
N bel grop de fascegn à tout pèrt al pelegrinaje sul percors de la GMG, metan adum la orazions a la Madona de Fatima e a Sènt Antone con la storia e la cultura del Portogal.
Galaria retrac
- L grop de fascegn tedant a la catedrala de Lisbona.
- I pelegrins tel gran piaz del santuarie de la Madona de Fatima.
View the embedded image gallery online at:
https://www.lausc.it/valedes-ladines/fascia/25618-n-viac-de-devozion-e-cognoscenza#sigProId71804bcb0d
https://www.lausc.it/valedes-ladines/fascia/25618-n-viac-de-devozion-e-cognoscenza#sigProId71804bcb0d