La neif che tant se speta via per l invern per corir i portoes da schi e che chest an se à fat dejidrèr, la é ruèda zacan, ma la é ruèda tel moment più falà e desche se l’aessa volù ne fèr n tort, la é ruèda coscita tanta che da n pez no se n vedea.
Te la fin de setemèna dai 24 e 25 de firé l era stat endrezà dut coche carenea per ge dèr alberch sul portoi La VolatA sun Sèn Pelegrin a doi garejèdes e superG de eles de Copa del Mond.
L à tacà a neiver jà en vender domesdì e defat l moment de inaugurazion a Moena (de chel che podede lejer chiò sotite) l é stat sot la neif. Dapò l à nevet duta net e sun Col Margherita l n à fat ju 70 zentimetres de frescia. Na squadra de 150 operatores coordené dal diretor de gara Cesare Pastore e dal diretor de portoi Mattia Giongo à lurà de pien, a scomenzèr jà da les cater da doman, per poder neteèr l portoi e endrezèr la pruma de la doi garejèdes, ma la gran cantità de neif no à permetù de garantir la segureza del portoi e coscita la Fis, do na ascorta valutazion, à dezidù de la descancelèr.
»Aon fat l possibol, ence de più – à dit Mattia Giongo - chest l é l sport del schi, noi sion mentalmenter enjigné ence a cheste situazion. L é vegnù dalbon tanta neif, na situazion n muie senestra da gestir però aon proà, sion jic ite con cinch giac e aon netà dul l portoi, aon tirà fora beleche 70.000 m3 de neif, aane de bone prospetive per la gara ma no la é jita.
De più su La Usc stampèda de en vender prum de mèrz. (Monica Cigolla)
Pascion, profescionalità e empegn: n gran grop per la Copa del Mond
La doi garejèdes de superG de eles te Fascia é states descancelèdes per massa neif ma Fascia à metù ju fondamenc staifes per l davegnir.
Galaria retrac
View the embedded image gallery online at:
https://www.lausc.it/valedes-ladines/fascia/26557-pascion-profescionalita-e-empegn-n-gran-grop-per-la-copa-del-mond#sigProIde8831756f4
https://www.lausc.it/valedes-ladines/fascia/26557-pascion-profescionalita-e-empegn-n-gran-grop-per-la-copa-del-mond#sigProIde8831756f4