La Usc di Ladins

Acà n secol, n temp scur à tout ite l paisc de Vich e sia comunanza. »Ai 19 de otober del 1921, da sera via, Maria Dall’Acqua Pica la é jita te sie tobià, lo da Piz de Vich, a se tor scedoles con te man na ciandeila«, coscita ne à contà Bruno Ghetta de Martin ensema con sia femena Dora de Bascian. Sion jic a ge domanèr fora de chesta degrazia: duc e doi i à sentù contèr de chest fat te cèsa e i é amò vives i recorc de chel temp tant rie.

Maria Pica la era nasciuda del 1896, l’aea fat i 25 egn ai 3 de chel meis. Chela sera la é rebaltèda con la ciandeila te man e la é sciampèda. La familia de Dora la se à brujà, si recorc l é chi de sie père Fonjo Tamion de Bascian: »Mie pare e l barba Bepi i aea 20 e 16 egn. I ge à dit a so pare: porton fora la roba, e el l ge à responet… Na, na! I destudarà po ben!«. Ma ampò, nesciugn à destudà nia. Te curt temp l tobià de Bascian l se à brujà desche dut l cianton de paisc: »Canche i studafech, che era rué da duta Fascia, i à tacà ite la mania – ne disc Bruno – no l é vegnù fora aga. I aea lavà fora la vasca en chel dì e i l’aea lasciada averta. La Veisc no la corea apede paisc. De grazia che l’aria la jia en su e se à brujà demò sora stradon, fin sunsom«.

Podede lejer dut su La Usc stampèda de en vender ai 28 de jugn.  (Nicoletta Riz)