La Usc di Ladins

Donèr sanch l é scempie e no costa nia, ma l é na azion che pel esser n muie de utol te la cura de la malaties oncologiches e del sanch, ti servijes de prum socors e de emergenza, te n muie de intervenc chirurgics e trapianc. Donca doventèr donatores de sanch fèsc ben. Fèsc ben ai etres e a se enstesc. Fèsc ben percheche ne dèsc la legreza de salvèr na vita e ence percheche con la donazion se tegn sot control la cartela clinica. 

I donatores volontères de sanch de la valèdes de la Veisc i é 1859, del 2023 l é stat fat 2316 donazions de sanch entriech. L é numeres gregn che deida a na vida determinanta a aer l’indipendenza ematica te noscia provinzia de Trent. Ma se pel fèr amò miec. 

L president de l’ADVSP Clerio Bertoluzza e l vize president Marco Ferreri auza fora l apel a doventèr donatores volontères de sanch e a se scriver ite a la sociazion. I fèsc a saer che i volessa envièr via endodanef la donazion de plasma che é stata lascèda su da desvalives egn e per chest vegnarà fat na campagna de informazion aldò. 

I componenc del diretif ADVSP valèdes de la Veisc se dèsc ju per fèr infomazion, soraldut anter i joegn e per chest i é do che i peissa a de neva scomenzadives per tor ite i studenc. Chi che volessa aer maor informazions o se scriver ite a la sociazion i pel se oujer al diretif ADVSP o ai responsaboi di gropes donatores de paisc, la sociazion @donatorisangueadvsp é ence sui social, olaches se pel condivider l retrat de la donazion.  (Monica Cigolla)