La Usc di Ladins

Lesc teater de la pruma Gran Vera che ne envia a fèr memoria tel segn de la pèsc. La setemèna passèda l recort de chi avenimenc l é stat uzà fora a Moena, chest istà sarà n’autra ocajion per palesèr con forza l valor de la pèsc. La Comiscion cultura de la parochies de Fascia, tel chèder de la 15^ edizion de la rassegna ‘Ispirazions d’istà’, la endreza la Marcia per la Pèsc. Sarà n event che vel slarièr fora n fort apel a la pèsc te n post che ne envia al chiet e l’armonia, ma che acà più che 100 egn l é stat un di lesc teater de la pruma vera con sia trincees e front de combatimenc: la val de Sèn Nicolò. 

En sabeda ai 20 de messèl se se troa da mesa les diesc te Mesaselva lo da la gejiola dedichèda a la memoria di sudé de duta la veres per jir ite per la Mont de Poza duc ensema fin ta Pe de forcia. A la Marcia per la Pèsc tol pèrt l piscop de Trent Lauro Tisi, l piscop de Belun-Feltre Renato Marangoni, l piscop de Treviso Michele Tomasi, ensema a la parochies e la sociazions de la val e a la Comiscion per la giustizia e la pèsc de la Diozesa de Trent. Sul troi l é pervedù 3 tapes con la testimonianzes da lesc de vera e de azions de pèsc e ta Pe de forcia se serarà su con vèlch reflescion. N moment emportant che se ouc a duc, sentadins e ghesć percheche la pèsc no à confins. 

Chest l é demò un di sacotenc evenc che la Comiscion per la cultura, con sie coordenador Cesare Bernard, à metù en calandèr per chest istà. 

De più su La Usc stampèda de en vender ai 28 de jugn.  (Monica Cigolla)