La Usc di Ladins

Ence chest an la sègra de Sèn Vile a Moena l é stat la festa de la comunanza religiousa e de chela zivila. Na festa grana che se à avert jà bel bonora en mercol ai 26 de jugn con i sonadores de la Banda che é jic en defilèda con i Scizeres, i Studafech e i raprejentanc de la Crousc Checena e del Socors da mont a descedèr fora l paisc. Chest an la Banda compesc 170 egn e per festejèr coche carenea l’à endò endrezà l tendon jun Navalge; do aer lurà trei dis dovia banco e anter i desć a secodir la gola e la seit de sacotenc avantores, ence col didament de n schiap de bec picoi che portèa tabarie più gregn che ic, l dì de Sèn Vile i sonadores se à fornì su con so guant più bel e i à fat sentir, e ence veder, l repertorie più bel che i à emparà via per chest ultim temp.

Dijaane veder, percheche no i à demò sonà, ma i é stac protagonisć de trei bela coreografies te piaz de Ramon. Aló, con la direzion del mazier Bruno Zanon Bareta, i sonadores à dessegnà endèna che i sonèa, n bel pavel, n cher e ence l numer 170. Dapò i se à tirà fin tedant Calonia olache i à spetà che vegne fora i preves per i compagnèr te gejia. Chest an la comunanza religiousa se à strent dintorn a Suor Berta Defrancesco del Comino (che l’à tout su l inom religious de Suor Liliana, ma a Moena l é restà per duc Suor Berta) che l’à festejà 60 egn de consacrazion.

De più su La Usc stampèda de en vender ai 5 de messèl.  (Monica Cigolla)