L repertorie de cianties per ladin no l é tant gran e per l’Union di Ladins aer tesć e partidures da meter a la leta de chi che à gust de ciantèr per ladin l é emportant. Con legreza donca en sabeda ai 29 de jugn, dì de Sèn Piere e Paul, la sociazion à prejentà te La Gran Ciasa a Soraga l regoi »Recorc en musega«, diesc cianzons per fascian del maester de musega Pietro Decrestina da Palua, nasciù a Soraga del 1945 e da egn enciasà a Roma.
Dut l é peà via amò del 2021 canche Monica Cigolla – che à prejentà l domesdì – la era jita a intervistèr Pietro Decrestina per La Usc di Ladins, do aer sapù da sie nez Peter, maester del Coro Nosc, che chest bèrba l era do a scriver cianties per cor per fascian.
Enlouta l é nasciù l’dea che l’Union di Ladins aessa podù les regoer e publichèr. Dapò l projet col Coro Nosc se à ferà, ma chel de l’Union l é jit inant, col didament de Fabio Chiocchetti, conseier de la sociazion ma ence espert de musega e autor de cianties e del joen Jan Dellantonio che l studia composizion musicala a Roma: a el ge é stat dat su da l’Union l lurier de trascrizion de la partidures scrites a man da Decrestina. L é nasciù coscita l bel regoi che l’Union à metù te n codejel dal titol »Recorc en musega. Diesc cianzon per fascian de Pietro Decrestina«.
Chest codejel é stata stampà te pecia copies per i cores, ma duc i enteressé pel jir sul sit de l’Union di Ladins de Fascia (www.ladinsdefascia.it) a veder, scutèr e desćiarièr tesć e partidures.
De più su La Usc stampèda de en vender ai 5 de messèl. (Lucia Gross)
I recorc en musega del maester da Palua
L’Union di Ladins de Fascia à prejentà l regoi de diesc cianties armonisèdes per cor de Pietro Decrestina, da Soraga ma enciasà a Roma, che vegn metudes a la leta de duc sul sito de la sociazion.
Galaria retrac
View the embedded image gallery online at:
https://www.lausc.it/valedes-ladines/fascia/27473-i-recorc-en-musega-del-maester-da-palua#sigProId90b5e2464b
https://www.lausc.it/valedes-ladines/fascia/27473-i-recorc-en-musega-del-maester-da-palua#sigProId90b5e2464b