La Usc di Ladins

Da doi egn en ca, la sociazion Parkinson Trento ensema co la sociazion Rencureme à metù a jir, te na sala aló dai trampolins de Pardac, n cors de ginastica per la persones de Fascia e Fiem che padesc de Parkinson. Chesta persones les se troa duta la setemènes via per l invern e l’aisciuda, de mèrtesc domesdì.
Rec l cors la joena e paruscenta fisioterapista Debora Guadagnini che la ensegna ejercizies che fèsc ben ai muscoi e al corp da poder dapò fèr ence a cèsa. Annarita Gabrielli, volontadiva e che la fèsc pèrt del diretif de la sociazion Rencureme, con gran cher la ge stèsc apede ai malé per i didèr e la se cruzia ence de tegnir neta la bela sala che l Comun de Pardac à conzedù per fèr la sentèdes de ginastica.
L cors l à ence n’autra gran valuta: i malé e sia families i sà che no i é soi, i se troa, i spartesc i cruzies e l senester de chesta magagna. Tolan pèrt a chest cors i é doventé amisc, i se sent al telefon, i à ja fat ence vèlch picola festa e chest fèsc n gran ben soraldut al spirit.
En vender ai 21 de jugn, te na giornèda de soreie, (i à abù dassen fortuna te n’aisciuda mola e molenta) i se à passà de bie moments ensema sun Duron.

De più su La Usc stampèda de en vender ai 12 de messèl.   (AV)