La Usc di Ladins

Encomai da tropes egn en ca, un di apuntaments più speté del istà sportif de Cianacei e sessaben de duta Fascia l é la Dolomyths Run, che chest an, estra che la maraveousa e spetacolara Dolomites Skyrace de en domenia, porta dant la sabeda ence doi garejèdes deldut neves. La iscrizions les se à serà su con l record de atlec scric ite, passa 1300 persones en dut, de chestes presciapech 850 te la Skyrace. »L record per nos l é amò più segnificatif chest an - ne à despiegà Giorgio Pedron del comitat de endrez - dalajà che no sion ite tel zircuit mondial Golden Trail World Series, ma demò tel zircuit nazional desche terza tapa. Aer 34 nazions raprejentèdes te n campionat talian ne fèsc esser stolc de noscia perferida«. Belapontin, la partezipazion al zircuit mondial l va a rotazion te anter la gares più iconiches del mondo.

La garejèdes neves

Per en sabeda ai 20 de messèl, se dejujarà doi gares neves, la Dolomyths Run Trail e la 12k. »Da desvalives egn pissaane a chisc neves apuntaments e zacan sion stac bogn de i endrezèr. La gara dintornvia l Sela oramai no l’aea nesciun appeal e no siane bogn de portèr più che 300 scric ite. Aon donca cernù fora n troi nef ti lesc più bie de la Val de sora, dintornvia Cianacei«.

Doman, vender sera, en colaborazion col comitat Ensema per Cianacei, sarà na picola defilèda e conzert de la Musega Auta Fascia lo dal parch di jeghes. Sabeda ai 20, da les 20:45 te Chino de Cianacei, l é stat endrezà n moment sportif de aprofondiment zis enteressant, de la disciplina del biathlon, che se arvejina en cont de fadia a la corsa sa mont: i giornalisć de Eurosport Massimiliano Ambesi e Dario Puppo sarà i ghesć de la sera, dal titol ‘Biathlon, dalle origini al boom in tv’.

En domenia la forenadoa de Sas Pordoi la sarà jà averta da les 8:15 e se podarà ge jir do a la gara ence en direta streaming. La premiazions les sarà en domenia da les 14:00 te Piaz Marconi de Cianacei.

De più su La Usc stampèda de en vender ai 19 de messèl del 2024


 (Nicoletta Riz)