»Cosmo – N univers da descorir« l é la neva mostra scientifica portèda dant da la Coprativa sozièla INOUT per l istà 2024, inaudèda en jebia ai 11 de messèl te scola populèra de Vich e che restarà averta fin en vender ai 23 de aost.
Per l quinto an a do a do ti meisc de messèl e aost l grop de joegn de Inout porta dant chesta proponeta fora de anter, aprijièda da la jent de paisc e dai ghesć, perché bona de comunichèr a na vida sorida e gustegola contegnui de carater scientifich e de engaissèr envers tematiches per solit senestres da entener. Do aer slarià fora ti egn passé i argomenc de la fisica di jeghes, de la lum, de la boles de saon e de la sezion aurea, chest an la mostra scientifica la met dant temes astronomics, jan a curiosèr anter steiles e pianec, galassies e bujes fosć.
Matteo Brigadoi, Sara Pilia, Fabio Magnani, Aline Baraldi, Desideria Degiampietro, Nadia Dellantonio, Ester Vian, Daniele Chiocchetti e Vincent Stambé l é i joegn che à tout te man l projet.
»Cosmo – N univers da descorir« la é averta duc i dis da les 3 a les 7 domesdì e de lunesc e de mercol ence da les 8 a les 10 da sera. Per maor info o per prenotèr vijita vidèdes se pel jir sul sito www.inoutfassa.com/mostra-scientifica o telefonèr al numer 3317959354. I joegn pascioné de scienza de Inout ve speta, per ve compagnèr a ve goder e maraveèr très la steiles.
De più su La Usc stampèda de en vender ai 19 de messèl del 2024
(Thomas Zulian)
Cosmo: n univers da descorir
L é stat avert te scola populèra de Vich na neva mostra a tem astronomich, n percors da marevea anter pianec, steiles e bujes fosć.
Galaria retrac
View the embedded image gallery online at:
https://www.lausc.it/valedes-ladines/fascia/27565-cosmo-n-univers-da-descorir#sigProId50b506d505
https://www.lausc.it/valedes-ladines/fascia/27565-cosmo-n-univers-da-descorir#sigProId50b506d505