La Usc di Ladins

L à soscedà n picol biteboi la neva che chest istà i ujes del Chino Marmolèda de Cianacei i restarà seré. L Comun de Cianacei no l à endrezà l avis de concors e dachelanvia la gestion no la ge é stata data su a nesciugn. L é da dir ampò che chesta situazion revèrda demò la programazion de film e l bar avert, dalajà che l calandèr di evenc lurà fora da la sociazion Ensema per Cianacei l à en program dotrei apuntaments te strutura, apede che la lèrga per de etres se fossa catitemp. Sun dut chest aon domanà fora l ombolt Giovanni Bernard per aer n chèder chièr de la situazion.

»D’uton l fit da dant l jia fora e per la sajon da d’invern aon fat na proroga – ne à despiegà Bernard – d’aisciuda volaane enjignèr l avis de concors nef per dèr su l Chino a fit, ma cognaane fèr lurieres de manutenzion sul impiant contra l fech e de segureza, estra che controi sul sciudament. Cauja che no sion rué a i fenir dant de endrezèr l avis, no podon dèr via na strutura che no la é deldut a post. Chest istà ne endespièsc ma l restarà serà e donca vardon de aer dut vertech per chest uton«.

De più su La Usc stampèda de en vender ai 19 de messèl del 2024  (Nicoletta Riz)