La Usc di Ladins

L gran cher del Aiut Alpin batea debel en vender ai 12 de messèl ta Dèlba, endèna che cent e cent brac forc de socoridores se strenjea entorn al amich Gino Comelli, oramai te vascel con sora l elmet del socors, e a sia familia, la femena Rosalba, i fies Angelica e Tommaso, i frèdes e parenc rué dal Friul.

Operatores del socors sa mont é rué per l obit da duta la Èlpes zenter orientèles, Studafech, Polizia, Carabinieres, Guardia de Finanza, Crousc Biencia e Crousc Checena, Istrutores, Ciamorces, Catores e Menacrepes da duta la valèdes ladines, dal Trentin e dal Sudtirol, dal Venet e dal Friul.

Duc adum per ge dèr l ultim salut a n om che se à tras dat ju per didèr, portèr socors, ensegnèr, sostegnir si compagnes ence ti momenc più ries.

Te la gejia de Dèlba piena de jent l era ence Rafael Kostner e Willy Costamoling, fondadores ensema a Comelli del Aiut Alpin Dolomites. Cercenà dai amisc del Socors da Mont de la Val de Sora, che Comelli à vidà per 25 egn e che i era duc entorn utèr, e compagnà da don Massimo Cautero, don Mario Bravin à rejonà de chest gran om, de sie bon cher e de sia capazità de didèr.
Damiano Fontanive del grop Cinofili à rejonà a inom de duc i corpes, de Polizia e Finanza, recordan ence el con comozion sie calità tecniches e umanes, e chel »benon, benon« restà tel cef de duc chi che à lurà con Gino. Fabian Oberbacher del Aiüt Alpinisć Alta Badia à portà l rengraziament no demò de sia squadra ma de dut l Aiut Alpin Dolomites, chesta gran familia del socors metuda su, no zenza dificoltà, ensema con i amisc Rafael e Willy.
I saluc e i regraziamenc é rué ence da Sergio Valentini, Igor Dantone e Stefano Comelli, l fra più joen de Gino. La volontà de Gino – l à dit – l é che sie cender posse vegnir portà a Trieste, lo che l aea scomenzà a jir a crepes, e fat sgolèr tel ciel, da olache se pel veder duc i monc da el tant amé, e restèr tel mèr.

De più su La Usc stampèda de en vender ai 19 de messèl del 2024

 (Lucia Gross)