La Usc di Ladins

L era furlan, Gino Comelli, nasciù ai 8 de mé del 1954. Da Versa (Vierse per furlan) frazion de Romans d’Isonzo, te la provinzia de Gorizia, con la familia l se à tramudà bele prest a Trieste, olache l é cresciù. Te chesta zità, a jir coi Scout, l é jervenà ence sie amor per l ambient, e te la Scola de alpinism Emilio Comici l é cresciù sia pascion per jir sa mont e rampeèr.

Ben prest Gino l à moscià sia gran valuta tel jir a crepes, tant che l dì do aer compì 17 egn l jia jà da prum su la Micheluzzi sul Piz Ciavazes. Del 1973 l à tout pèrt a na spedizion te la Groenlandia e l an do l aessa podù jir a fèr l melitare tant a la Scola Alpina de Aosta che a chela de Moena. L é ruà a Moena, olache con De Francesch, Vuerich, Romanin l é doventà menacrep, maester de schi e istrutor e con Innerkofler l à scomenzà a fèr la pruma esperienzes de socors. Do n cors te la Val d’Aosta l é diventà l prum istrutor nazionèl de socors tel Trentin e l à fat esperienzes te duta la Tèlia per veder coche i fajea te etres lesc. Del 1989 l é stat nominà a cef del Socors de l’Auta Fascia, encèria che l à portà inant per 25 egn, fin al 2015.

Del 1995 l é stat nominà Cavalier e del 2011 ge é stat dat l recognosciment de Ofizièl al Merit del President de la Republica.

De più su La Usc stampèda de en vender ai 19 de messèl del 2024.  (Lucia Gross)