La Usc di Ladins

Gino Comelli l é ruà a vidèr i intervenc de socors te n moment de gregn mudamenc. L numer di intervenc seghitèa a crescer debel, chel sistem che do ores e ores de empegn e pericol i socoridores ruèa sul post massa tèrt e i portèa a cèsa beleche semper persones zenza vita, no l podea più jir. L mudament l é scomenzà col miorament di materièi, che i doventèa semper più tecnics, con n arcedament semper più profescionèl di volontères, con duc i aparac per se chiamèr e se sentir tel besegn, ma soraldut l gran mudament l é ruà con la doura del jolier per intervenc più asvelc e col medico diretamenter sul post. Da intervenc de vint persones che stajea fora na dì entria, se é passé a intervenc de manco persones che de spes vegnia seré su te no più che vèlch ora.

Ma i maores problemes i restèa a livel istituzionèl. Ti egn ’80 l era demò i jolieres militères, che i era massa peigres, i stajea ores a ruèr, e dapò no i podea portèr i morc, e la persones se cognea les portèr ju, vives o mortes, con gran fadia e pericol per i socoridores.

Chesta situazion la era medema te duta la valèdes ladines, e coscì do se aer binà e rejonà anter socoridores de Fascia, Gherdena e Val Badia, Gino Comelli, Rafael Kostner e Willy Costamoling i à dezidù che la soula strèda l era meter su na Union anter la squadres de socors de la Dolomites, regolarmenter costituida dedant a n notèr.

De più su La Usc stampèda de en vender ai 19 de messèl del 2024  (Lucia Gross)