La Usc di Ladins

L é stat dalbon n bel conzert, chel che en domenia ai 14 de messèl l é stat endrezà te la sala grana del Istitut Cultural Ladin a Sèn Jan. Un di diesc apuntamenc, più 4 workshop, che met adum la seconda edizion de la rassegna internazionèla de museghes populères ‘Discanto’, endrezèda dal METS, l Museo Etnografich Trentin de Sèn Micel, con la direzion artistica del etnomusicologh Renato Morelli, che tel passà l à colaborà più outes con l Istitut Cultural de Fascia.

Chesta rassegna, dedichèda a la ciantia populèra ‘a cappella’, é peèda via l prum de jugn e la jirà inant fin en sabeda ai 27 de messèl e l’à portà a se esibir tel Chioster del METS e te desvalives etres lesc del Trentin 5 cores rué da Paijes desferenc: da la Transilvania rumena a l’Auta Corsica franzousa, da la Georgia a la Sardegna, e da la Bulgaria. L Cor ruà enstadì te Fascia l vegn apontin da chest paisc balcanich, che l à n Ciant polifonich particolèr che del 2008 l é stat adertura scrit ite te la lingia di patrimonies imaterièi de l’Umanità da l’Unesco.

A prejentèr dapò la carateristiches de chesta sort de ciantia populèra e la esecutores l é stat apontin l diretor artistich de ‘Discanto’ Renato Morelli, che l à rejonà de chel che al lonch l é stat conscidrà n ‘mister’ de la musega populèra bulgara, che la se desferenzia da chela de duc i etres paijes, tant per ritm che per la vida de manèr fora la ousc.
L é stat dalbon più che n conzert, ma na vida per emparèr elemenc de musega, de etnografia, de geografia e auter amò. La rassegna ‘Discanto’ se sera su te la fin de setemèna che vegn col cor sard Cuncordu da Orosei che porta dant l repertorie polifonich tradizionèl de chesta isola. I sarà en sabeda ai 27 tel Chioster del METS da les 9 da sera e a Vermiglio te la gejia de S. Caterina en domenia ai 28 da les 5 domesdì.

De più su La Usc stampèda de en vender ai 19 de messèl del 2024

 (Lucia Gross)