La Usc di Ladins

»Soraga anima e natura« l é l inom de n event che vel uzèr fora la beleza de nosc ambient natural, ma ence sotlineèr che te val l é n muie de profescionisć che se dèsc ju per chierir l’armonia e l ben stèr de duta la persones che te val vif o rua.

Anter la organisadores l é Elisa Bruno, che da egn la porta inant a Ciampedel n zenter olache la se cruzia del benstèr de la persones a livel energetich spirituèl, e Gladia Debertol, cognosciuda dai letores de chest sfoi per si consees aldò de la luna, ma che la é ence psicologa e esperta de desvalives etres tratamenc olistics. 

Eles doi ne à dit vèlch de più sun chest event, che vel esser na pruma proa de na sort de ‘fiera’ del mond olistich.
Te chesta ‘esposizion del mond del benstèr naturèl’ arà lèrga 15 proponetes desferentes, la maor pèrt l é persones diplomèdes o adertura pluridiplomèdes che sporc n servije n muie profescionèl te val, dapò l é ence vèlch proponeta de laboratories o esposizions a livel più amatorièl.

»Sion dutes operatores olistiches – les ne à dit – che vel dir che se cruzion del benstèr de la persona, con tecniches desferentes ma dutes che vèrda la persona te sie ensema, fat de corp, ment, ènema e spirit, vardan donca la pèrt energenica, emotiva e psicologica, no demò l aspet fisich, con  disciplines naturèles che ge va do ai mecanismes de auto-benstèr.«

De più su La Usc stampèda de en vender ai 19 de messèl del 2024



 (Lucia Gross)