La Usc di Ladins

Sun na paladina fornida su con pien de fiores dai colores de la bandiera ladina, te piaz Marconi de Cianacei en domenia ai 8 de setember l é stat zelebrà l cedean di 50 egn de Dolomiti Superski. Na festa pissèda e voluda proprio tel chèder de la Gran Festa da d’Istà ajache, descheche à dit dantfora la presidenta del Consorzie de impianc portamont de Fascia/Ciareja Elisa Maccagni, la festa l é l maor moment de comunanza de la valèdes ladines.

L moment zelebratif é stat avert da Diego Clara, responsabol di media e de la relazions publiches de Dolomiti Superski che te n bel fascian à saludà duta la autoritèdes ruèdes per l’ocajion a Cianacei.

Apede a la senatora Elena Testor, l assessor al turism de la Provinzia de Trent Roberto Failoni, l assessor a la medranzes linguistiches de la Region Trentin Sudtirol Luca Guglielmi, l procurador del Comun General de Fascia Giuseppe Detomas, l ombolt de Cianacei Giovanni Bernard, l president de l’ApT de Fascia Fausto Lorenz e l diretor Nicolò Weiss e l president de Dolomiti Superski Andy Varallo l era ence i raprejentanc de la Forzes del Orden e de duta la sozietèdes di impianc portamont de Fascia.

50 egn l é n travert emportant per la storia de Dolomiti Superski e per dut l teritorie de la Dolomites e per chest la zelebrazion tolarà ite duc i 12 consorzies che fèsc pèrt de chesta realtà, à dit Diego Clara. La festa é pontèda via da Cortina ai 24 de aost per ruèr enstadì te Fascia e dapò jir inant te l’autra valèdes e la se serarà su ai 23 de dezember. Te chesta tapes i raprejentanc se passa na sort de focola che rafegura en miniatura l’opera ‘Enrosadira’ che l artist Daniele Basso à creà belimpont per chest cedean.

De più su La Usc stampèda de vender ai 13 de setember.  (Monica Cigolla)