La Usc di Ladins

En martesc ai 26 de november na burta neva à tocià la comunanza de Pera e de duta Fascia. L é mort Claudio Gabrielli de Pavarin.

Nasciù a Pera ai 8 de oril del 1945, Claudio de Pavarin dal 1957 al 1961 l aea fat la scola de aviament profescional ja Pardac, che per el enlouta someaa jà na zità. »Ere sperdù desche n giat sot na capa – l  scrivea te na testimonianza su La Usc del 2012 – ma le reisc de l’amor per la letura, la scritura e la musega ‘auta’ é nasciude proprio te chi egn de scola«.

Ge saea bel scriver, tegnir su e dar testimonianza de chel che sozedea, e apede a sie lurier a le Poste, l é stat per n muie de egn colaborador del sfoi Trentino. L é semper stat n muie vejin al moviment ladin, Conseier de l’Union di Ladins de Fascia ti egn ’80, del 1983 l é stat ence nominà canzelist de la sociazion. 

Ma soraldut l à scrit per ladin: no se pel dombrar l numer di articoi che l à scrit per La Usc di Ladins e per la redazion de la RAI Ladina de Busan: per chisc media ladins, con sia sigla CdP, Claudio Gabrielli de Pavarin l é stat colaborador e corespondent de la Val de Sot per zirca 40 egn.

N auter gran empegn de duta soa vita, e fosc so enteres maor, l é stat chel miscionarie. L à scomenzà del 1965 a jir a tor su papier veie col grop de joegn da Pera e Vich che ge era jic do a la proponeta de Mani Tese, e ti prumes egn ’70, canche se à creà n bel grop de joegn volontadives l à proponet de meter su l Grop miscionarie da Pera e de meter chisc joegn sot la protezion del miscionarie ladin da Oies, che no l era amò stat beatificà e che dapò fossa doventà sènt. L é nasciù coscita l Grop Miscionarie Freinademetz, de chel che Claudio l é semper stat pont de referiment, ejempie, tegnir la corespondenza coi miscionaries tel mond.

La sepoltura é anché jebia ai 28 de november da mese le trei domesdì te gejia de Pera.

(De più su La Usc stampada)


 (Lucia Gross)