La Usc di Ladins

Apajé ia n comportamënt agressif, por n dialogh plü costrutif
Ai 27 de novëmber vëgnel tigní n referat te Ciasa de palsa a San Martin, olache ara nen vá dla deescalaziun, por prevení violënza y agresciuns
La Ciasa de Palsa Ojöp Frëina­demetz inviëia dër bel al referat »Aggressives und herausfor­dendes Verhalten; gibt es einen Weg aus der Eskalation?« cun la referënta Helga Oberhofer, en mercui ai 27 de novëmber dales 20:00, tl Barjënt dla Ciasa de palsa. La deescalaziun é na mosöra che pó prevení violënza y agre­sciuns, sides tla vita privata sciöche ince sön le post de laur.
Le referat, che sará por todësch, é davert a düc y é debann.

Carsharing a Urtijëi
L Chemun de Urtijëi y la Lia dl Turism de Urtijëi nvieia ala prejentazion ufiziela dl servisc »Carsharing«, n vënderdi ai 29 de nuvëmber dala 15:00 sun Plaza de Dlieja a Urtijëi
L Chemun y la Lia dl Turism de Urtijëi pieta – n cunlaurazion cun la AlpsGo Carsharing Alto Adige – n servisc nuef de Carsharing (partì n auto), dai 1. de dezëmber inant. L sarà a despusizion doi auti a lectrisc tla garasc de Pana, che n possa mpresté ora. Chisc auti puderàn resservé tres l’aplicazion sun l fonin AlpsGo y adurvé per vel’ ëura o nce dut l di.
La prejentazion ufiziela ie n vënderdi ai 29 de nuvëmber dala 15:00 sun Plaza de Dlieja a Urtijëi, daldó saràl nfin la 18:00 la puscibltà per la zitadines y i zitadins de purvé ora i auti.

Teater ladin dedicà a Vigilio Iori
I Servijes linguistics e culturèi del Comun General de Fascia met a jir la rassegna de teater
La rassegna de teater é dedichèda a Vigilio Iori, se n jit de dezember del 2022, n om che à abù gran gust per la cultura te ogne sia forma, per la letradura, per la poejia, per l’èrt e bensegur per l teater.
Ti egn l se à palesà desche n pionier tel ciamp del teater sperimentèl te Fascia, l à portà dant neva vides e formes arti­stiches che anchecondì les é de gran valuta per l teater ladin. Vigilio Iori l é stat n vijionarie del teater sperimentèl te Fascia che à segnà n nef troi per la generazions che vegn.
La rassegna taca ite ai en sabeda ai 30 de november e la portarà dant 15 apun­tamenc con 6 gropes de teater fin ai 4 de mèrz del an che vegn.
Program
La Mizacoles con ‘N lomescel da des­gatièr’: 30.11 h 20:30 te Oratorie de Poza; 01.12 h 16:00 te Teater de Cianacei; 03.12 h 20:30 a La Gran Ciasa a Soraga;
I Bontemponi con ‘Zacan zeche da za­car’: 07.12 h 20:30 te Oratorie de Moena; 08.12 h 16.00 te Oratorie de Poza; 10.12 h 20:30 a La Gran Ciasa a Soraga;
La Sociazion Culturèla Antermoia con ‘La eles de Dioniso’: 13.12 h 20:30 al Pala­Dolomites de Ciampestin;
I Amisc del Teater de Moena con ‘Loc­dàun’: 14.12 h 20:30 te Teater de Cianacei; 15.12 h 16:00 te Oratorie de Moena;
La Biblioteca de la Majon di Fascegn con la compagnia ‘Trei carc de ora’ con ‘Do l vièl del saer’: 11.01 h 20:30 e 12.01 h 16:00 a La Gran Ciasa a Soraga;
L Grop de la Mèscres de Dèlba e Penìa con ‘Te tieja del ors’: 20.01 e 27.02 h 20:30 te la Scola veies de Penìa;
L Grop de la Mèscres de Dèlba e Penìa con ‘Gotèrt e Nazio nun à rejon’: 08.02 e 04.03 h 20:30 te la Scola veies de Penìa.

Gran Batadù di Destudafuech de Sëlva
I Destudafuech de Sëlva nvieia al Gran Batadù da 128, n dumënia ai 24 de nuvëmber tla sala di Destudafuech te Sëlva
Coche da tradizion mët i Destudafuech de Sëlva inò a ji n Gran Batadù n dumënia ai 24 de nuvëmber. Dala 10:00 inant puderàn »Frühschoppen« y daldò puderàn s’la lascé jì bona y sté n cumpanìa pra na bona marënda cun Törggelen. L turnoi de Batadù scumëncia dala 14:00 y per mutons y mutans dai 5 ai 12 ani saràl n turnoi de »Mau Mau«. L sarà nce mujiga dal vif y devertimënt cun la grupa »Conturines Echo«, che sunerà dala 16:00 inant y n puderà sambën vëncer de biei pesć, danter chisc n Skipass per Gherdëina, n »Day Spa« y n bon per cumpré ite te na butëiga dal sport. Sëuraprò saràl mo truep de biei pesć da pudëi vëncer pra l cëst dala fertuna.
Iscrizions vën tëutes su n chël di dala 10:00 inant tla sala di Destudafuech.

Conzert de

• 
•  

View the embedded image gallery online at:
https://www.lausc.it/manifestazions-y-evenc/28307-manifestazions-atuales-speziales#sigProId67d2727723

Santa Zezilia a La Pli
La Musiga y le Cor de dlijia inviëia chësta domënia domisdé
En domënia ai 24 de novëmber dales 15:00 é düc bel inviá te dlijia da La Pli de Mareo. La Musiga y le Cor de dlijia da La Pli tëgn le conzert tradizional de Santa Zezilia. N domisdé plajor, cun cianties y melodies por onoré la patrona dla musiga de dlijia.

Cursc da pastelné por Nadé
La designera Pia Pedevilla tëgn cater cursc, te so atelier a Bornech, tla Gross Gerau Promenade 6c
Figöres dla cripele de lëgn
Por mituns da 6 agn insö (acompagná) y insegnanc, en sabeda ai 30 de novëmber dales 14:00 ales 18:00.
Decoraziuns da Nadé cun deplü tecniches
Por adulc, mituns da 8 agn insö (acompagná) y insegnanc, en domënia al 1. de dezëmber dales 14:00 ales 18:00.
Angeli & Co. – figöres de lëgn
Curs por adulc y por mituns da 12 agn insö (acompagná), en sabeda ai 14 de dezëmber dales 14:00 ales 18:00.
Tiers da orëi bun (Holzwürfeltiere)
Curs por mituns da 7 agn insö (acompagná), insegnanc y düc i interessá, en domënia ai 15 de dezëmber dales 14:00 ales 18:00.
Le prisc de vigni curs é de 60,00 euro a ce plü 25,00 euro por le material (i acompagnadus ne paia nia). I cursc vëgn metüs a jí en colaboraziun cun l’EPL–Ert por i Ladins. Al vëgn tut sö alplü 6 partezipanc a curs. Info y iscriziuns pro Pia Pedevilla al numer 348 2221745, info@piapedevilla.com

Magia dla nuet
Ncuei vendërdi ai 22 de nuvëmber dala 20:30 vëniel giaurì tla galaria Vijion a Puntives na mostra dal titul »magia dla nuet«, che uel se lascé ite tla ventura de cie che la nuet à dut da nes pité
La nuet ne ie nia mé n tëmp danter l jì ju y l levé dl surëdl, ajache la à bën scialdi deplù da pité: la gëura n mond misteriëus y lascia jì la cuscienza dalonc dal reél. Da for incà ie la nuet l tëmp dl amor, dla nasciuda, dla melancolia, de fé la cioca y sambën nce n sëni dla mort.
La ie tan plëina de sucrec, che artisć de uni cëntené se à dat ju cun chësta tematica. La trasmët tëma y legrëza y tl medemo tëmp pietela truepa nterpretazions artistiches. I artisć y la artistes Julia Bornefeld, Leonora Prugger, Cornelia Lochmann, Alexander Staffler y Ingrid Klauser prejenterà l’emuzions che la nuet ti da a d’ëi.
La mostra resterà davierta nchin ai 21 de dezëmber, dal lunesc nchin la sada dala 16:00 nchin la 19:00, o cherdan su l 3382098697.

Imparé por l’ejam de trilinguism
Curs tla cornisc dl proiet

• 
•  

View the embedded image gallery online at:
https://www.lausc.it/manifestazions-y-evenc/28307-manifestazions-atuales-speziales#sigProId67d2727723

PNRR »La Pli – n tesur da descurí«: imparé por l’ejam de trilinguism (ladin, livel B2, C)
Te savessel bel da lauré pro le sorvisc publich de Südtirol? Chiló él tröc laurs interessanc, olache al ó indere ester l’atestat de bilinguism o trilinguism. Sce te t’as tut dant da fá l’ejam de tri­linguism, pó chësc curs oghé. Te 5 incuntades vë­gnel fat eserzizi por imparé le ladin scrit dla Val Badia, cun regoles de gramatica y de ortografia, sciöche ince na simulaziun dl ejam scrit y de chël a usc.
Le curs vëgn tigní les jöbies ai 5, 12 y 19 de dezëmber 2024, sciöche ince ai 9 y 16 de jená 2025, tl salf di cursc dl Istitut Ladin a San Mar­tin de Tor. Iscriziuns anter i 29 de novëmber ala mail ulrike@micura.it . Le curs é debann y al vëgn tut sö cina 15 porsones.

Marcé da Nadé t’La Spona
Tl zënter sozial La Spona a Pidrô vëgnel indô tigní le Marcé da Nadé, en sabeda ai 30 de novëmber, dales 9:00 ales 16:00
Al mët man bel plan da gní frëit, i dis che nes despartësc da Nadé vëgn tres demanco y l’atmosfera vëgn tres plü plajora. Porchël oress i assistis y i assistënc dl Zënter sozial La Spona dër bel invié al Marcé da Nadé.
En sabeda, ai 30 de novëmber Ves aspetunse dales 9:00 ales 16:00, por ves mostré ci che i s’un ponsé fora de bel. I pitun creaziuns y decoraziuns fates a man, idees por scincundes da Nadé, gherlandes d’Advënt, lëgns da Nadé tradizionai y moderns, angeli, scatores de lignan vedl y n gröm d’ater bel patüc.
L’Uniun Ladins Val Badia presentará n liber dales 14:30, cun n’ora de letöra por families. I esson dër ligrëza sce i gnisses a nes ciafé, i Ves aspetun.

Cunzert de S. Zezilia
La Mujiga de Urtijëi nvieia al cunzert tradiziunel S. Zezilia n dumënia ai 24 de nuvëmber dala 17:00 tla Cësa di Cungresc a Urtijëi
Cun l cunzert fina via l ann de mujiga dla Mujiga de Urtijëi. L dirighënt Egon Lard­schneider à cris ora nce chëst ann n pro­gram drët nteressant, dan­ter l auter la suite »The Earle of Oxford’s Marche«, scrita da William Byrd, la Fantasia da concerto »Rigo­­­letto« de L. Bassi cun la so­lista Anna Senoner y Sce­nes from »The Louvre« de Norman del Joio.
Tla segonda pert jiràla inant cun pec plu moderns coche »Rhine River Impressions« de Mario Bürki, »Aurora Borealis« de Rossano Galante y »Sogno di Volare« de Christopher Tin. Stlut ju vën l cunzert cun l pez »Tom Jones in Concert« de G. Tinner.
Duc i apasciunei de mujiga ie de cuer nviei a unì a scuté sù l cunzert de S. Zezilia.

Tëmp da Nadé te museum
En sabeda ai 30 de novëmber dales 17:00 él tl Museum Ladin Ciastel de Tor n conzert dles mitans y di mituns dla Scora de musiga Val Badia
Le Museum Ladin Ciastel de Tor deura sües portes ince d’invern y inviëia ala manifestaziun »Tëmp da Nadé te mu­seum«, cun n conzert dles mitans y di mituns dla Scora de musiga Val Badia, en sabeda, ai 30 de no­vëmber dales 17:00. I vijitadus y les vijitadësses gnará partis sö te deplü grups, che gnará condüc un al iade te ciastel a ascuté le percurs musical.
Al vëgn perié do na prenotaziun a un de chisc orars: 17:00, 17:20 o 17:40. Prenotaziuns al 0474 524020 o ala mail prenotaziuns@museumladin.it .
L’entrada tl museum é debann. Al vëgn pité da bëre y da mangé, por mi­tans y mituns vëgnel proponü n la­boratore didatich.

Na Bibia ladina por pici y gragn
Ai 30 de novëmber vëgnel presenté a San Martin le liber »Tüa Parora cunta – La Bibia por pici y gragn«. Al sará ince n quiz cun pesć
L’Istitut Ladin Micurá de Rü inviëia en sabeda ai 30 de novëmber dales 15:00 tl gran salf dl Istitut a San Martin de Tor, ala presentaziun dl liber »Tüa Parora cunta – La Bibia por pici y gragn«, metü adöm da Renate Valentini, cun ilustraziuns de Chiara Lacedelli.
Ala presentaziun tolará pert les auturies, sciöche ince le canonicus dl dom da Porse-nú siur Ulrich Fistill y le cabaretist Simon Kostner.
L’acompagnamënt musical vëgn pité dal cor di scolars dla scora elementara da La Ila. Al sará ince n quiz cun pesć.