La Usc di Ladins

La notes de la Musega da Vich e la oujes di corisć e coristes del Cor de gejia à rendenì bel fort en vender ai 22 de november te la Pieif de Sèn Jan. En Sènta Zezilia, patrona de la musega, di strumentisć e di ciantores, l é stat dit messa te la Pieif dal piovan don Andrea Malfatti. Na bela messa, dassen, per fèr referiment ence a la paroles de don Andrea te la pardicia, che à lascià de gran emozions ti cheres di fidei. 

Na ocajion de festa e de legreza che l’à abù sia pieneza te la zelebrazion eucaristica per la sènta martire.
Chi che cianta ‘ben’ prea doi oute – à dit amò don Andrea fajan referiment a la paroles de Sènt Agostin. Canche se n jiron fora de gejia segur duc dirà che ‘bela messa’, na esprescion che se disc e che veide scrita ti articoi per fascian. Vela chiò voscia testimonianza de Die che passa travers l bel, la musega la é bela e Die l é bel. 

L’ultima outa che l Cor de gejia aea ciantà te la Pieif ensema a la Musega l era stat del 1993, l Cor era vidà da Carleto Chiocchetti de Rosa e la Musega dal maester Fiorenzo Brigadoi. Enstadì purampò se à podù aprijièr la beleza de na messa duta ciantèda e sonèda adum da Cor e Banda. La messa che l é stat cernù l’à inom ‘Missa Pro Pace’ e la é stata metuda ju del 1986 dal compositor Daniele Carnevali (1957).

De più su La Usc stampèda de vender ai 29 de november.

 (Monica Cigolla)