La Usc di Ladins

En lönesc da doman, canche i jô da Pidrô sö cuntra La Val, êl niui grisc y pesoc sura la contrada. N valgügn de chisc niui s’á trat ite cina te salf dl Consëi de Comun, olache al ê söl program dales 9 la sentada costituënta, do les lîtes di 10 de novëmber. Na sentada che á metü man normalmënter, cun le salüt da pert dl aconsiadú plü vedl – Davide Frenes. Lizia ésera ince jüda pro i pröms punc de dovëi, olache al é gnü confermé la litabilité impröma dl Ombolt instës y spo di aconsiadus y dles aconsiadësses. Cina chiló á düc alzé la man y lité a öna. Y l’Ombolt á ince fat le joramënt. Plü zitia y movimentada ésera deventada pro le punt prinzipal dl de, olache l’Ombolt á presenté süa proposta de Junta. Do feter döes ores de sentada ésera gnüda aprovada, cun 11 usc a öna y 4 decuntra, cun chësta partiziun:

Felix Nagler – ombolt: urbanistica, laurs publics, personal, patrimone, jonëza, lizënzes y finanzes
Felix Dapoz – vizeombolt: proteziun zivila, turism, agricoltöra, economia forestala, viabilité y le jomelinaje cun Pfronten
Magdalena Miribung – assessuria: scora, scolina y ciasa di pici, cultura, setur sozial y families, comunicaziun, informaziun y consëi de formaziun
Alex Alton – assessur: uniuns, ambiënt, plann dl clima, sport, inovaziun y energia sostenibla
Carlo Nagler – assessur: artejanat, comerz, condütes de comun (eghes, forza eletrica y fira otica), sorvisc ambientai (refodam ez.), frabicac de Comun

Cina che an é rová ala litaziun él sté tröpa discusciun, y n aconsiadú á cinamai incundé sües dimisciuns. Nos ên presënc ala sentada. Che ch’al é y ci che al é sozedü, ves cuntunse t’La Usc di Ladins di 29 de novëmber.


 (pablo)