La Usc di Ladins

»Travers ti eies« l é l titol del spetacol che la Cèsa de Paussa à endrezà en vender ai 15 de november te Oratorie de Poza. Sun paladina trei artisć che à conjobià ousc, recitazion e musega per contèr con paroles, notes e emozions la malatia del Alzheimer. L spetacol é stat scrit da Giovanni Dallapè, ciantautor e musicoterapist che laora al zenter de Alzheimer de l’APSP Civica de Trent che, ensema al ator Luca Pedron e al musizist Stefano Bonatti al piano, conta la storia vera de Marco, n om de 68 egn malà de Alzheimer che à descorì coche la musega abie n ruol emportant te chesta sia neva fasa de vita per mantegnir l leam con so gran amor, soa femena Anna.

Dantfora la responsabola de l’animazion e de l’atività de la Cèsa de Paussa Serena Pederiva e la presidenta Barbara Bravi à recordà che chest projet fèsc pèrt de la scomenzadives del Projet de trei egn per l svilup de na Comunanza Amica de la persones con demenzes. N auter apuntament l é en program insnet vender ai 22 de novamber semper te Oratorie de Poza da les 20:30 col dotor Giorgio Fumagalli. 

De più su La Usc stampèda de en vender ai 22 de november.  (Monica Cigolla)