La Usc di Ladins

»Recordèr Alessandro, Diego, Erwin, Luca l’é i aer amò chiò: i veder, i scutèr, i grignèr, spartir con ic de auter temp te la man averta de la Tera, del Ciel, de la Vita…«. Chest l é l pensier scrit da Stefen Dell’Antonio Monech, sul prum meis del calandèr prejentà enstadì per recordèr i cater socoridores morc da Sèn Stefen te Val Lastìes acà encomai 15 egn. No podea esser mior post che la palestra ADEL a Ciampedel entitolèda a ic, per recordèr e binèr adum families, socoridores e jent da mont per chesta ocajion.

N calandèr de recort che no à doudesc meisc, ma un de più, ‘Dizember 2024’: »Se aon domanà che che podaane far par recordar nesc amisc« à spiegà Germano Rasom del grop de redazion, »no aon volù far valch da gran, ma n recort che val par n an entriech e no par na dì demò«. 

Chel che l é vegnù fora l é n ‘segnadis’ che ne rejona de natura e de emozion: laite se mesceda fotografies da chiò entorn de Alessandro Gruzza (fotograf da Trent de livel internazional), Alessandra Baldi (fotografa e colaboradora del Socors da mont) e Stefen Dell’Antonio (doi retrac de besties). De Stefen Monech l é ence e soraldut l enchioster de la poejies e reflescions per ladin che compagna vigni retrat e meis. 

De più su La Usc stampèda de en vender ai 22 de november.  (Nico)