La Usc di Ladins

L soreie spizola amò da dovia Locia, la ombries vegn pian pian semper più autes. De neif no l n à binà amò nience na cevila. L deslabeea e l’èghes va ju per la salaa. L vièl che da Penìa va fin sal Vera l é pesticià, pedies de jent e besties… cerves e cians de segur. Assunta e Teresa les é sentedès ju sun banch, a soreie, sotvia i sedimes de Insom. Sun Gran Vernel, ló che soreie no bat, la neif somea fèr bechec. L ciel l é rosul e freit. Teddy l é butà ju sotite banch: te chela che rue ló apede, l se destira e l se tira su en pe. Batuffolino enveze no se l spia. Pian pian se tiron te cèsa da fech, Teddy l vegn do, l mena pian la couda, l se struscia su per la giames.

Assunta la met su café; la doi sores scomenza a contèr de coche l era chi egn l Nadèl sal Vera. »L èlber de Nadèl jane a l tor chiossù zaolà. L fajane su duc insema con balota veies, picoi pomes de èlber, noujes, mandarins, biscoc. La mama la i injignèa e l papà l ge fajea ite l busc. I tacane su, ma per canche l desfane de biscoc no n era più… I pomes de èlber l era l’ameda Alma«, conta Teresa, »che la ne i portèa da Busan su olache la lurèa da chi todesc de sartora, a Eppan«.

Podede lejer dut su La Usc stampèda de en mèrtesc ai 24 de dezember.  (Nicoletta Riz)