La Usc di Ladins

I é fora daperdut: te la boteiga de magnadiva, ju per la scèles, te bar, ti partimenc extralimentares. L é i retrac en bianch e neigher che l fotograf Davide Baldrati à fat per l projet fotografich ‘Cartes de visite’ envià via jai doi egn en colaborazion con l Istitut Cultural Ladin.

En mèrtesc ai 11 de mèrz te bar del Fassa Coop l é stat n picol moment de prejentazion del percors portà a compiment che ades vegn valorisà ence de gra a la colaborazion con la Coprativa de Fascia.

»Nos-etres« l é l titol che ge é stat dat a chesta esposizion de presciapech 250 fotografies e l é ence l titol del catalogh che l é stat stampà, de gra al contribut de la Region Trentin-Sudtirol.

»Te 50 egn, descheche ades nos ge vardon amò ai retrac de nesc veies, sarà n gran bel jir a veder chisc retrac en bianch e neigher daldidanché – à dit la presidenta de la Majon di Fascegn Tea Dezulian - retrac che sarà la storia che sion do a scriver. N projet che ades veit ence la colaborazion percacenta con la Coprativa de Fascia e chest ge dèsc segur maor valuta«.

Na colaborazion che l Consei de Aministrazion del Fassa Coop à tout su con gaissa, à dit l vize diretor David Pisoni.

Davide Baldrati à recordà con emozion coche l é nasciù l projet, do aer vedù che anter i prumes egn del Doimile e aldidanché l é n busc ti archivies fotografics per via che ades vegn fat dut col digital.

De più su La Usc stampèda de en vender ai 14 de mèrz del 2025  (Monica Cigolla)