La Usc di Ladins

Su da Francesca se podessa stèr na dì intria in vila a ciacolèr, che amò no l’aessa contà un chèrt de chel che la se recorda de duc chenc si 94 egn de età. La se recorda franch de coche inlouta l era stèr a Cianacei e a Gries, de la vita de paisc, de coche chesta doi viles les se à slargià fora in lench e in lèrch e les é doventèdes un paisc soul.

Francesca Mazzel, maridèda Sottsass, l é incomai doventà una de la femenes più de età de duta canta Cianacei. La é nasciuda ai 23 de setember del 1930 fora Gries ló da cèsa Marmolèda, cèsa de chi del Ors. La era fia de Elisabetta Iori de Mita e Eugenio Giovanni Battista, Tita del Ors, secretèr de Comun, »te cèsa no l dijea gran che, de mestieres de Comun no se sèa proprio nia. Gé dapò son min jita belebon bonora da cèsa«. Sia mère Elisabetta la é morta che l’èa 42 egn e Francesca la n èa 16. Tita l se à maridà en seconda nozes con Elisabetta Riz Peta da Ciampedel.

Del 1950 Francesca la é jita a Milan a lurèr de mascèra te na familia. »Son jita mingol daperdut. A Milan son stata demò un invern percheche no me piajea la zità. D’aisciuda son vegnuda de outa. L era una tousa che cognoscee che la me à dit che la jia al pas de Falzarego a lurèr te na utia desche chelnera e coscì ge é domanà se la podea domanèr un post ence per me… La dì do sion jites su, son stata aló doi egn«. Imbendapò l é coscita che aon scomenzà via a ciacolèr con Francesca, bon in lench e sessaben, dassen da piz a cianton tel temp e ti recorc.

De più su La Usc stampèda de en vender ai 14 de mèrz del 2025  (Nicoletta Riz)