La Usc di Ladins

Söl »Rodeo Drive«, le cör de Bevery Hills, á daurí amez forá 2020 n restorant gourmet coordiné dal cogo da stëres Massimo Bottura, la »Osteria Gucci«, tl comples dla boutique de Gucci. Tan che l’ostaria á pordejü da daurí, che al é salté fora ince a Bevery Hills la pandemia dl coronavirus: ai 18 de merz 2020 á le restorant messü stlü.
Tamara Rigo d’La Pli de Mareo che fej pert dla scuadra de ciasadafüch de chësta esperiënza nöia a Bevery Hills: »Chiló tla California é döt chit y öt, y dötes les famojes spones dal mer y botëghes é stlütes aldefora di magazins dai alimentars y dles apoteches, al é n monn nia da crëie.« I ún abiné la chef de conditoria Tamara al telefon, y ala domanda ci che ara fej respognera: »I sun tl laur da arjigné ca tortelins, chi conesciüs de Bottura, por i partí fora sciöche aziun de marketing, danter i VIPs.« A Bevery Hills á le coronavirus descedé danter la jënt le borjú da cumpré ite döt ci che jô, por suravire la »carantena« tles ciases nobles y viles. Tamara Rigo: »Les prömes döes edemes dl ‘dockdown’ n’êl da ciafé plü degöna farina no pasta, y gnanca papier igienich, döt venü fora«.
La fortüna dla scuadra de ciasadafüch dl restorant de Gucci é stada chëra da avëi resserves de ciasadafüch, por cujiné por se instësc. Gucci n’á nia sospenü le personal dl restorant, aspetan da podëi tosc daurí. A chësta manira cujina, mo te de pici grups, le restorant. Tamara: »I n’ún nia podü cujiné por asport, ajache i n’ên nia ciamó arjigná aladó, mo i tolun pert ala organisaziun de benefiziënza che cujina y cöi adöm pasć por la püra jënt sön strada. I messun ponsé che a Los Angeles él n gröm de jënt che vir sön strada, y ma bele sëgn por la crisa á sis miliuns de porsones pordü le laur. Tröc se tira adalerch tla California por le bun clima.« Co vir pa sëgn la jënt zënzatët? »Alé sté le Govern californian che á organisé da ti dé alberch ti hotí y te strotöres provisores, ince jö cuntra les spones dal mer, chësc é da laldé.« Y co vir pa i VIPs? »Nos ne odun y ne aldiun chiló söla Rodeo Drive püch y nia, la jënt mët dër averda da nia rodé y se taché le virus.« Dal ater vers é i VIPs a ciasa, »tles viles nobles« él da dí, ajache Bevery Hills é abitada por la maiú pert da jënt conesciüda dal film, dal intrategnimënt, dala televijiun, dal’ert y dal jornalism. Tamara: »Chisc ne sint bunamënter nia tröp dla pandemia y crisa, y dai gragn problems, ai á la palestra, plazes da tennis, nodadoia y i sorvisc elementars te ciasa.« A Bevery Hills é la cualité de vita dër alta, ince sce an vëiga chisc dis rodan püc auti nobli, por tröc VIPs sará chësta crisa na chance da sté a ciasa y passé momënc manco da prescia y stress. Tamara: »Sce an vá a cumpré ite patüc da mangé, sambëgn cun le mascherot indos y tignin les destanzes, vëigon pücia jënt.
La jënt stá plü ion a ciasa y se lascia condü le patüc. Bunamënter se tëmera da rodé fora de ciasa.« Stlütes é desco tla Talia les scores y palestres, i chinos... y ince i trus da jí a pe y i parcs dla California é stlüc ai spaziranc y sportifs. Le monn söla »West Coast« é chit, nia plü da conësce! Bunamënter n’él dai agn dl 1848 incá, canche i »forty–eighters« capitâ adalerch da mesa l’Europa a chirí brunchi d’or y la gran fortüna, nia plü tan chit. Sëgn mëss ince la »fortüna« aspeté a de mius tëmps, por daurí sö indó LA y i restoranc, a na manira che la jënt ciafes indó fle por vire na vita normala. Sëgn n iade pé cinamai la Silicon Valley, nia tan dalunc da Bevery Hills na »ghost town« –altamo alaleria.

Impresciuns da Bevery Hills de Tamara Rigo! Lapró na süa foto!

 (Iaco Rigo)