La Usc di Ladins

Chi che laora tröp sön computer y cun i lingac, sá tan comoc che i traduturs automatics pó ester. Al basta n click por ciafé na traduziun de na parora, na frasa o tesć intiers. Chisc traduturs ciafon sambëgn ti gragn lingac dl monn, tratan che i lingac de mendranza toma plülere sot grata. Insciö ésera ince por le ladin, che á tl monn digital fat valgügn vari importanc, mo che mancia ciamó pro sorvisc importanc. Öna de chëstes loces dess sëgn gní curida cun le jonn Samuel Frontull da Framacia te Mareo, che laora por arjigné n tradutur automatich dl ladin. Le gran laur é sambëgn ciamó da fá, mo intratan á süa idea bele descedé gran interes. Pormó dan püces edemes é süa iniziativa gnüda premiada cun le "Eduard Wallnöfer Preis 2021" – n pest nominé aladô dl politich Eduard Wallnöfer, che é sté dal 1963 al 1987 "Landeshauptmann" de Tirol. Al vëgn dé fora dala "Eduard Wallnöfer Stiftung der Tiroler Industrie" a porsones de Tirol y de Südtirol y la juria á odü tla idea de Samuel Frontull n proiet de gran valüta. Insciö ára tut la dezijiun da le sostigní cun 2.500,00€. Cun Samuel á pié do le pest ince so acompagnadú tl proiet Tobias Hell.

Cun Samuel Frontull unse baié plü avisa de chësc proiet de valüta. Deplü ciafëise t’La Usc di Ladins di 8 de messé  (pablo)