La Usc di Ladins

Chësc vëndres ai 9 de forá s’á destodé ia la vita de maester Pio Baldissera, na porsona y personalité conesciüda nia ma te so paisc nadé, na porsona che á dé ca tröp tëmp de süa vita por la comunité. Pio Baldissera é nasciü ai 8 de ma dl 1929 a La Val. Do la scora elementara él sté dui agn tl Vinzentinum a Porsenú y spo ál frecuenté l’Istituto Magistrale, la scora da maester taliana, a Balsan. Tl 1957 él gnü a sté a San Martin de Tor olache al á metü sö familia y á spo insigné 30 agn tla elementara dl paisc. Na vita intiera él sté a sorvisc dla scora y dl’educaziun de mitans y mituns. Dlungia la scora ál ince dagnora desfiré n gröm d’atres ativités, che á arichí la vita soziala y culturala dla comunité da San Martin de Tor. Maester Pio á p.ej. ince fat pert dl Consëi de Comun, al é ince sté vizeombolt, y é sté 22 agn alalungia presidënt dla Ciasa de palsa – chë ciasa olache al á ince passé l’ultim tëmp de süa vita. Gran é sté so contribut y l’arpejun leterara che al á lascé zoruch. A San Martin é bëgn feter düc i gragn avenimënc, n gröm de festes dla comunité mo ince privates, gnüdes acompagnades y abelides cun n pinsier, n fersl o val’ rima de maester Pio. Mefodër l’ann passé ai 27 d’agost êl gnü presenté en süa presënza le liber "Poesies y rimes", olache al é gnü coiü adöm na cerna de sü tesć. Do na vita implida, á sëgn maester Pio sëgn podü jí zoruch tla Ciasa dal Pere. A sü familiars i vá les condolianzes plü sintides. Che maester Pio pois ciafé la palsa miritada.  (pablo)