La Usc di Ladins

Felix Dapoz da Ciablun a La Val nes á lascé al’eté de 86 agn.
Nasciü tl 1938 sciöche ultim de 17 mituns sö Ciablun, a La Val, á Felix Dapoz fat les scores por maestri da Maran. Naota al insigné tles scores dla Val Badia, y dedô él rové sö Toblach, olache al á insigné y olache al é sté orghelist y dirighënt dl cor de dlijia por 50 agn alalungia.
Al á dagnora desmostré n gran talënt por la musiga (al á ince fat na formaziun de musiga sacrala a Viena) y tres sües cianties nes ál scinché tröpes y de beles testemonianzes de chësc so talënt. Al á ince scrit la musiga por desënes y desënes de tesć de d’atri auturs (dantadöt de Lois Ellecosta) y na bela compëda de cianties componüdes da ël fej incö pert de nosta miú tradiziun musicala popolara.
Sce le contribut che Felix Dapoz á dé tl ciamp musical é bele gran, spo é so contribut tl ciamp leterar o, dit damí, poetich cotan majer. Scebëgn che süa produziun ne n’é nia propi forüda (i rovun sö a püch deplü co 80 liriches, danter componimënc originai y traduziuns), s’á Dapoz impó afermé sciöche un di gragn auturs dla Ladinia, n protagonist de valüta dla scritöra artistica y leterara tl lingaz ladin.

Che al pálses tla pesc de Dî! I adorun sües parores, che al ti á scrit te na poesia a n so amí mort:
… Insciö te n’este jü da nos,
este jü inascusc a ciasa
dal Gran Pere dla bunté
y nos sun sëgn chiló;
al plüra l’ cör
sintiun indô deplü
dles legremes la val
stracian inant
dl vire crüde pëis. …