La Usc di Ladins

La noela che nes arjunj chësc vëndres é öna de chëres pesoces. Angel Miribung, ombolt dl Comun da La Val y seniorchef dla firma Decor da Pidrô, á pordü la vita por gauja de n inzidënt te munt. Le fat é bele sozedü en jöbia y dales prömes informaziuns che i un ciafé, êl jü cun n compagn de paisc a fá le Biancograt, sö por le Piz Bernina (4.048m) ti Grijuns. Por dinamiches da tlarí plü avisa é Miribung slisoré jö, forsc por gauja dl ciarü che ê gnü sö. Les chirides á metü man, mo n’á baldi nia porté früt chë sëra y nöt. I socoridus é indô piá ia chësc vëndres da doman. Baldi é Angel Miribung gnü ciafé zënza vita.
Na noela che s’á atira slarié sciöche n tarlí, danter la jënt y i tröc che n’ê nia bugn da crëie. Angel ê na porsona che jô dër ion sö por munt. Al lascia zoruch sü familiars, a chi che al i vá les condolianzes plü sintides. Y al lascia ince öt le scagn da pröm zitadin da La Val, che al á curí cun dediziun y impëgn dal 2015 incá. Che al pois palsé tla pêsc.

Plüra ince tla SVP Ladina
Ciamó incö domisdé á tut posiziun dl fat ince la SVP Ladina, pro chëra che l’Ombolt da La Val ê tl comité de liam: "Angel Miribung ê n ombolt dër ingajé, che á fistidié cun pasciun de so Comun y de sües zitadines y zitadins. Al â dagnora na orëdla daverta y le bëgnsté dla jënt â por ël priorité. Nosc pinsier ti vá te chësc tëmp de dolur y de comié a süa familia", scrí le vizepresidënt dla SVP Daniel Alfreider, che sotrissëia ince l’operat politich de Miribung: "Süa politica ê caraterisada da n sentimënt sot de iustizia y da süa sensibilité por les porsones sozialmënter plü debles. Al ê important por ël che degügn ne restass zoruch. Süa manira daverta y süa sensibilité umana ti pormetô da tó les dërtes dezijiuns por la coletivité. Süa vijiun y süa prudënza nes manciará. Al ê n dër amich", dij Alfreider.  (pablo)