La Usc di Ladins

Le termo dles Olimpiades dl 2026 vëgn tres plü daimpró y sëgn vëgnel lauré sön deplü versanc por arjigné ca strotöres y infrastrotöres. Danter chëstes él ince de maius laurs sön feter 2 km dla strada che condüj da San Ciascian sön Ju de Valparola: n toch de strada olache al é ince ti agn passá tres indô sté smöies, peres y lovines. Sciöche i un bele scrit te n’atra ocajiun, gnarál tl concret ressané apresciapüch n chilometer de strada, olache al é preodü da renforzé la strada, realisé mürs de sostëgn nüs y renforzé chi che é bele, mioré les condütes por la desgorta dl’ega. Te plü toc vëgn spo la strada fata danü y te un n toch ince spostada. N’atra novité é che tla cornisc de chisc laurs gnarál ince depënt sön strada na striara aposta, resservada por i ziclisć.

Paziënza sön strada
Al é da capí che canche al vëgn lauré sön strada, él ince limitaziuns dl trafich; insciö ince sön Valparola, olache la strada messará da d’altonn gní stlüta por plü edemes daldöt, sciöche l’assessur Daniel Alfreider á dit en gaujiun de na vijita söl post, ai 20 de jügn: "Tles munts savunse che i laurs pó ma gní fac ti mëisc da d’isté. Chiló sön Valparola unse tut l’ocajiun da fá danü la strada che é dër rovinada y da mëte lapró ince na striara ma por i ziclisć, sciöche i un bele fat sön le Ju dl Sela. I damanun sambëgn la paziënza de chi che adora la strada – sides la jënt dl post che ince i turisć. Chësc isté sarál sigü problematich por le trafich y dl ater vers adorarunse ince da d’altonn n mëis y mez olache la strada sará stlüta daldöt y an messará tó d’atres strades por podëi fá inant i laurs."  (pablo)