La Usc di Ladins

"Al plöi mefo vigni de", é les parores che an alda dër gonot te chëstes ultimes edemes. Y l’impresciun é davëi chëra. Y canche al ne plöi nia, spo él da nio. Chësta aisciöda é chiló da nos propi caraterisada da n tëmp tres malsigü: al é dainré n de deplëgn cun sorëdl; scialdi él grisc y da nio, canchessî vëgnel la plöia – tres danü. Y ci che chëstes plöies plü abondantes co zënza pó tlafinada fá, án odü te na manira imprescionanta a Lungiarü. I sun jüs a ciaré do plü avisa pro le sorvisc meteorologich provinzial, por odëi tan de dis che al é veramënter gnü la plöia y sambëgn ince tanta che al n’é tomé. Chësc unse fat analisan i dac dles staziuns provinziales de Corvara y San Martin de Tor, y na staziun privata a Al Plan.

Plöia de ma, mai assá?
Tignon cunt che al vëgn araté n de de plöia sce al toma almanco un n mm d’ega, spo unse a Corvara chësta situaziun. Sön i 31 dis de ma él sté bëgn 21 dis olache al é gnü la plöia, olache al n’é tomé indöt 202,5 mm. Le de plü mol é sté ai 16 cun 42,8 mm. Le paisc da San Martin "se l’á cavada" cun 18 dis olache al é gnü la plöia y al n’é tomé döt adöm 40 mm demanco co a Corvara: 161,4 mm. Le de plü mol é sté ai 16 cun 34,9 mm. Ala fin ciamó Al Plan, olache an á ince albü 18 dis cun plöia, mo na cuantité totala de 200,3 mm. Le de plü mol é le medemo co ti atri dui paisc, cun 38,6 mm d’ega.

Jügn é inant malsigü
De jügn ésera jüda n pice pü’ miú, mo le tëmp malsigü tëgn bot tres inant. Cina ai 24 de jügn (denanco jí en stampa cun La Usc) unse albü a Corvara y Al Plan 13 dis olache al é gnü plü co n mm d’ega y a San Martin 12.
A Corvara él tomé 148,1 mm d’ega cun le de plü mol ai 12 (36,6 mm); a San Martin él tomé 123 mm cun le de plü mol ai 12 (26,8 mm); a Al Plan él tomé 121 mm d’ega cun le de plü mol ai 12 (27,9 mm).  (pablo)