Por chi co ne n’é nia lëite tles organisaziuns de socurs él oramai na cossa logica. Sce i sun enzano sö por munt y mo feji me, o sce i adori aiüt por val’ atra ocajiun, bastel fá en numer y i volontars vën adalerch. Massa püch gonot ponsun che cöstes porsones le fej gonot debann, con de gran sacrifizi y ince renunzienn a so tomp... de familia, de laur, tomp lëde. Horst Valentin d’Al Plan l’á fat por passa 50 agn y porchël él gnü onoré con le titul da "mëmber d’onur" dal CNSAS – Corpo Nazionale di Soccorso Alpino e Speleologico – a livel nazional y ince a livel provinzial.
Horst é belo jü pal aiüt alpin de Mareo ala fin dai agn ’70 y con le 1980 él spo gnü tut sö ofizialmonter. Dal 1999 él gnü lité capostaziun, na enciaria che al á albü tles mans 15 agn alalungia; ince dedô él ciamó sté na perioda vize y öna te consëi. Nasciü l’ann 1958, ál con 65 agn, tan co dal 2023, arjunt "l’eté dla ponsiun" da socoridú. Le CNSAS á endere con cösta onoranza orü ti reconësce düc i miric che al s’á fat te passa mez secul de vita y cionc de intervonc. I s’án encunté empara por se fá na ciacolada sön le socurs desche al ea laota y desche al é donté.
La intervista cun Horst Valentin podëise lí t’La Usc di Ladins di 5 de messé. Iló odarëise ince la foto de süa cherta da mëmber, sciöche ince chëra de na defilada, olache döt á pordërt metü man. (pablo)
Horst Valentin é "Socio Emerito" dal socurs alpin
En gaujiun dla sontada generala dal socurs alpin CNSAS de Südtirol á l’ex capostaziun dal Aiüt Alpin Mareo Horst Valentin podü pié do l’atestat da mëmber d’onur dal socurs alpin CNSAS nazional y provinzial. I s’al án cuntada empara
Galaria retrac
View the embedded image gallery online at:
https://www.lausc.it/valedes-ladines/val-badia/27456-horst-valentin-e-socio-emerito-dal-socurs-alpin#sigProId96a9cc74ca
https://www.lausc.it/valedes-ladines/val-badia/27456-horst-valentin-e-socio-emerito-dal-socurs-alpin#sigProId96a9cc74ca