La Usc di Ladins

Al ne passa cuaji nia öna tempiada che i stödafüch ne mësses nia fora a daidé. Y n post olache ai vá oramai feter "regolarmënter" é la localité Ciamaor daite d’Al Plan, olache le Rü dal’Ermo sot crëp de Paracia slavatëia jö n gröm de material. Insciö ésera ince stada en mertesc do les 7 da sëra. Bele la jöbia de nöt – dl’edema passada – â le Rü dal Ermo bele mené jö material cina sura le secundo saltadú, mo tla pert dessot â le let dl rü ciamó cotan de lerch. Chësc s’á mudé te cört tëmp le mertesc sëra, canche la plöia groia á gaujé le rest. L’Ombolt Felix Ploner ê bele denant söl post, sciöche sce al l’ess tofada. Y belavisa: na dërta colada de paltan y material é raitada ite y jö y é ince passada sura punt fora, sopolin la strada comunala cun chi 40 cm de paltan. Degun dann ne n’él sté ales strotöres – gnanca pro la spiaggetta che é atira defora.
L’intervënt é impó indere defata gnü avié. I Stödafüs d’Al Plan é rová söl post por saré jö la strada y mëte jö sac de saurun, por paré che le material se tiras do strada fora; te chë mesora êl ince söl post bele trëi pacheres dla dita ME Tiefbau y la gomada de Comun por delibré la strada y romené fora material. Dales 21:30 án daurí por cört tëmp, por lascé fora i ciafêrs di auti che ê dan la roa tla Val, y spo l’án tignida stlüta döta nöt, olache i stödafüch á ince fistidié da vardé la roa. Chësc mercui da doman é la strada indô gnüda daurida, sciöche l’Ombolt nes á dit, porchël pón passé tres por jí tla Val y sö por munt. Sciöche la Cooperativa Turistica lascia alsavëi, é ince la "spiaggetta" daverta. An ne pó ma nia plü en ite a pe. Al é ince bele pacheres söl post por tó fora material y delibré le let dl rü, y fá insciö indô lerch. Lassö él na munt de material y pro chësta roa n’él nia la domanda sce ara vëgn, mo can che ara vëgn.  (pablo)