La Usc di Ladins

Do n mercui scialdi da sorëdl, él da sëra indô gnü de gran plöies, che á en chësc iade fat dann suradöt ti comuns da San Martin y La Val, ince pro ciases.

La Val: smöia te cianoa y siëia desgorta
I Stödafüch da La Val é gnüs alarmá bele tla pröma sëra, olache ai á albü da jí tla vijinanza da Ju cuntra Spëscia. "Dailó él jü n rü surafora y é rové cina ite y jö te na ciasa", dij le comandant Daniel Vallazza. Chësta n’é nia la sora groaria che an á albü. Eghes y paltan é ince rovades pro na picia siëia, che é gnüda ingravada y romenada. La vijinanza da Ju é stada le post d’intervënt prinzipal, olache i stödafüch á albü da daidé romené fora les cianoes y romené demez la roa. Lapró án ince albü da vardé le Rü dla Gana o le Rü da La Val, che s’â intratan slunfé bindebó. Vallazza inant: I un controlé l’ega da La Val fina jö Pidrô, por vardé che ara ne s’abinass nia sö. Chiló unse odü che i laurs che chi dai Rüsc á fat i ultims agn á funzioné dër bun." Nia inultima án controlé jö le raiun cun la drona, por ciaré che al ne foss nia roes dales perts. Inscioma, na serada de gran laur por i stödafüch, che é rová te magazin pormó incër la öna de nöt.

Antermëia: smöia a Al Bagn
Intervënt dötaurela sön tru él indere a Antermëia, tl comun da San Martin. Ince dailó án albü gran laur da en sëra incá. "Al gnô ega indlunch", dij le comandant di Stödafüch d’Antermëia Ulrich Rubatscher. Lassö án albü da fá suradöt da punt d’Antermëia cina ala óta dal Bagn y sö Al Bagn instës, olache al é gnü jö na smöia che é baldi arsida tla cianô dla ciasa vedla. Material cun peres y lëgns él ince gnü da Frapes jö, ci che á sforzé da stlü la strada danter Mirí y la burcia da Rina, che é dötaurela sarada. Sëgn - dales 9:00 - aspeton i tecnics, che fajará spo les valutaziuns che ó ester. La deviaziun é da Rina altaite.

San Martin: eghes te cianoa, terac che dá do
Sö Al Bagn á daidé ince i Stödafüch da San Martin, che á spo albü frunc de deplü versc te so paisc. "Le pröm intervënt é sté pro le Rü da Restalt che é gnü jö bindebó gran, y dailó él ince jü ite ega paza te dui garasc", cunta le comandant Damiano Moling. Lapró jôl te plü posć ega dlungia strada jö, olache i stödafüch á albü da deloje eghes y despifé tombins, por che ara tirass sot. Dl ater vers dla tëmpla él sté da jí sö cuntra Anví y Ju, olache al é te dui posć jü jö terac atira sot a strada, olache i stödafüch é jüs a assiguré le raiun. Nia inultima éson ince jüs defora da Picolin cuntra Longega, olache al é le rü da Col de Tlames che é gnü bindebó sterch y á slavaté jö paltans y lignan tla Gran Ega. "I sun stá a controlé deache le rü drucâ bindebó la Gran Ega cuntra strada", dij inant Moling. En sëra é ince i Stödafüch da San Martin rová te magazin pormó incër mesanöt.

Pro düc chisc intervënc é sambëgn dagnora ince informá y ala pert i lauranc dl Sorvisc strades y de chi dai rüsc. Intratan vá inant ince i laurs a Ciamaor daite d’Al Plan, olache an á 4 pacheres söl post che laora cun slöm por fá lerch, sce al ess da gní indô rî tëmp. pablo  (pablo)