La Usc di Ladins

Le scapulier ê n drap che les porsones de convënt se tirâ surajö da ji a lauré alaleria; al gnô porté sura la tunica jö y rovâ dant y do cina jö dai pîsc. Tl pröm n’ê le scapulier nia d’ater co n ciaz da laur o n gormel da gnidé. Al é spo passé a n toch dal vistimënt de jënt de convënt (patri y mognans) y vëgn incö dötaurela vistí danterater dai patri benedetins, dai domenicans, dai carmelitans y dai zisterziens, ince dales mognans de chisc ordins. Chëstes porsones vëiga tl scapulier n simbol dla crusc de Gejú Crist ch’ai ó se ciarié söles sciables y porté tres döta la vita.
Do la liënda é le scapulier nasciü canche Santa Maria ti é comparida dl 1251 al pater carmelitan Sciomun Stock tla Gran Bretagna, vistida cun n scapulier; ara ti â dit che chi che portâ le scapulier canche ai morî, n’â nia bria da se temëi da püzé jö tl infern. Chësta storia – na impormetüda de Santa Maria – ê gnüda cuntada inant y tröc â ciafé crëta da porté scapuliers. La Dlijia á reconesciü i scapuliers sciöche sacramentai, sëgns sanc, val’ de benedí dala Dlijia.
Dal scapulier da vigni de o gran scapulier él spo gnü adinfora na forma cotan mëndra, le pice scapulier, che i patri portâ dandaía tratan la palsa de nöt. Chësc é spo ince passé dal convënt ales porsones laiches tla forma de döes de pices pilores, liades adöm da dui corduns, che vëgn portades öna söl piet y l’atra söl spiné. N scapulier dess porté fortüna y stravardé da vigni sort de mal. Mo ch’al ais chësta faziun, mëssel gní vistí a chël che le porta da n prou che mëss dí, tratan ch’al le fej, oraziuns scrites dant.

Deplü podëise lí t’La Usc di Ladins di 11 de aurí  (Lois Trebo)