La Usc di Ladins

Corvara: Marcé dl patüc fat a man
Creativité, savëi y fantasia é trëi parores che an pó adoré por definí en cört le »Marcé dl patüc fat a man – ediziun da Pasca«, che gnará a s’al dé ai 13 d’aurí a Corvara
La Uniun dles Ëres da Corvara mët a jí en domë­nia ai 13 de aurí dales 10:00 ales 17:00 le »Mar­cé dl patüc fat a man – edi­ziun da Pasca«, tl salf dles manifestaziuns da Cor­vara.
Al gnará metü fora patüc fat a man da pert de incër 30 esposituries y esposidus. Na pert de ci che vëgn trat ite i jará al »Wün­schewagen« dla Crusc Blancia – che ti ejau­dësc i »ultimi deji­ders« a porsones che s’arji­gna da morí.

Melodies, musiga y amizizia fora por l’isté
La Musiga di Jogn Val Badia sonará ince chësc ann. Les iscriziuns vëgn tutes sö da atira, cina ai 15 de ma
Ince en chësc ann se abina indô la Musiga di Jogn Val Badia a livel de valada. Inviá a tó pert al proiet é düc i mituns y dötes les mitans di paisc dla Val Badia, che stlüj jö cun l’ann de scora 2024/2025 le 2. ann d’insegnamënt de n stromënt a fle o dles percusciuns.
I musiconc jogn y les musicontes jones á la poscibilité da soné adöm a n grup de com­pagns y compagnes che partësc la pasciun por la musiga, da imparé cosses de basa che reverda le soné y da contribuí individualmënter cun ligrëza, motivaziun y impëgn al bel garaté de n toch musical.
Le proiet mët man cun n Workshop da soné de dui dis, che vëgn tigní ai 30 de jügn y al 1. de messé 2025 tla scora elementara d’Al Plan. Fora por l’isté vá spo inant les proes tl local dla Musiga da San Martin, dagnora dales 18:30 ales 19:30.
L’organisaziun de chësc proiet se damana sambëgn ince tröpes spëises; insciö vëgnel damané do n contribut de 80,00€ a ce.
Les iscriziuns vëgn fates online sot al link https://form.jotform.com/250613163287354 y é davertes cina ai 15 de ma. Sot al link ciafëise ince informaziuns ciamó plü avisa sura le proiet.
I y les verdajogn dles musighes dla Val Badia se la conforta da podëi saludé tröc musiconc jogn y tröpes musicontes jones cun gran ligrëza y tröpa motivaziun da soné!

»Fá jö i tiers – mia pasciun«
Sot a chësc titul él ai 9 d’aurí a San Martin de Tor na proieziun multimediala cun Josef Bachmann
Le Fotoclub Val Badia inviëia indô a na proieziun multimediala de fotografies, en mercui ai 9 d’aurí dales 20:30, tl gran salf dl Istitut Ladin a San Martin de Tor. Protagonist dla serada é le fotograf Josef Bachmann, che á la pasciun da fá jö tiers tla natöra. Bachmann é nasciü y chersciü sö te Antholz, olache al ê bele da möt gonot te bosch y sö por munt. Al á metü man da fá jö dan za. 10 agn, y mostra dantadöt retrac che al á fat ite en Antholz y incëria. Te süa proieziun odarán indere ince le leopard dla nëi, fat jö tl raiun dl Hi­malaya indian.

L’architetöra dl bëgnester
Trasformé la ciasa te n post de armonia y energia positiva. En mertesc ai 8 d’aurí dales 19:30 él tla Ciasa J. B. Rinna a San Ciascian n referat sön l’architetöra che fej sté bun
Avënes d’ega, ciamps magnetics, eletrosmog o la costruziun falada pó avëi n influs sterch sön nosta sanité y nosc bëgnester, gaujan desturbs dl sonn, me de ce, stanchëza cronica, tenjiuns muscolares y d’ater. Le Consëi de formaziun Badia mët a jí en mertesc ai 8 d’aurí dales 19:30, tla Ciasa J. B. Rinna a San Ciascian le referat dal titul »L’architetöra dl bëgnester«. Tratan chësta incuntada vëgnel traté le »Vastu«, la vedla sciënza dl’archite­töra universala, che armonisëia i frabicac cun les energies dla natöra. Referënc é Johann y Valeria Burger. Ara se trata de na buna ocajiun por capí co trasformé la ciasa te n post de armonia y energia positiva.

Clima: ci podunse pa (ciamó) fá?
Ai 9 d’aurí él tl Museum Ladin a San Martin 
n referat cun Marc Zebisch dl Eurac
Le Museum Ladin inviëia al referat »Mudamënt dl clima söl monn – y tl Südtirol. Ci podunse pa nos (ciamó) fá?«.
Al vëgn tigní en mercui ai 9 d’aurí dales 18:00, tl Museum Ladin Ciastel de Tor a San Mar­tin. Re­ferënt é Marc Ze­bisch, le responsabl dl »Zënter por mu­damënt dl clima y trasfor­maziun« dl Eurac.
Le re­­fe­rënt analisëia ci mosöres y strategies che an podess invié ia, sides a livel local co global, por contrasté les de­sfides da sëgn.

Prugram de svilup cumenel de Urtijëi
L Chemun de Urtijëi nvieia al domesdì de nfurmazion y spiegazion n con dl prugram de svilup cumenel per l teritore y la cuntreda n vënderdi ai 11 de auril tl self dl Cunsëi de Chemun
Danter la 16:00 y la 20:00 ie i tecnics che à laurà ora chësc documënt a despusizion per spieghé si pert dl program y respuender a vosta dumandes. L Cunsëi de Chemun à dat pro la pruposta dl prugram de svilup cumenel per l teritore y la cun­treda, che vën śën ejamineda dala Cumiscion provinziela. Ntant possa uni zitadin dé ju al Chemun ubiezions y usservazions che unirà valutedes. Sot ala plata in­ternet dl chemun y tla rë zivica iel mesum desćiarië duta la documentazion dl prugram. Duc i zitadins ie de cuer nviei a passé!

Garejedes sozieles de schi alpin y pudejé
L Schi Club Gherdëina nviëia duc i apasciunei dl sport, funzioneres, atlec, genitores y simpatisanc a fé pea chësta garejedes, n sada ai 12 de auril te Val
La garejeda de slalom lerch scumëncia dala 9:00 sun l purtoi Cir. L sarà truepa categuries y l unirà nce chëst ann fat na categuria a pert per families, ulache l muëssa fé pea trëi dla medema familia, cun almanco un n grant (pere, oma, ava o nëine).
La garejeda de pudejé ie dala 9:30 inant te Val. L unirà fat na cumbinazion cun l slalom lerch y l pudejé! Per tramedoi garejedes iel da se scrì ite nchin a n vënderdi ai 11 de auril dala 14:00, mé tres email a info@sci clubgardena.info. L priesc de iscrizion ala garejedes ie de 10€ a persona/atlet y de 25€ per la families. Sambën ne manceràl da maië y da bever per duc.
La premiazion sarà pona ntëur la 14:00 dlongia la utia Ciampac, ulache n puderà vëncer scialdi de biei pesć y danter duta la families che fej pea uniràl trat ora ala busca n schipas per la sajon che vën.
Duc canc, pitli y granc, campions y de tei dal sport dala dumënia ie nviei de cuer a fé pea. L ie na blòta ucajion per sté adum, s’la ciaculé y fé festa.

Cunzert: 
Stabat Mater
Tla dlieja de Urtijëi uniràl purtà dant l cunzert »Stabat Mater«, de G.B. Pergolesi, n sada ai 12 de auril dala 20:00
La sëira unirà nvieda via cun na ntroduzion de Sn. pluan Vijo Pitscheider. Daldò puderàn scuté su l bel cunzert de mujiga sacrela, cun la ciantarines Erika Mussner–sopran, Sabina Willeit–alt, l dirighënt Giorgio Fasciolo y l grup »Ars Musicae« cun Günther Ploner (prima vidula), Chri­stian Ploner (segonda vidula), Friede­mann Ploner (viola), Christian Bertoncello (celo), Norbert Gianmoena (contrabas), Judith Piccolruaz (orgun).
La ntreda ie a dunfierta liedia. Duc y dutes ie de cuer nviei:des.

Cunzert dl’Urchestra Haydn
I Jëuni de Mujiga Gherdëina nvieia al cunzert dl’Urchestra Haydn: 
n juebia ai 10 de auril dala 20:00 tla Cësa di Cungresc a Urtijëi
Per finé via la lingia di cunzerc di Jëuni de Mujiga de Gherdëina ne pòssel nia mancë chël dl’Urchestra Haydn de Trënt y Bulsan, chëst ann sot ala bachëta de Alessandro Bonato. Sun l prugram saràl pec de Tschaikowsky, Nocturne Op. 19/4 (per celo y urche­stra) y »Variations on a Rococo Theme«, Op. 33 y de Shostakovich , Sinfo­nia da camera Op. 110a  (Arr. R. Baršaj).
La chertes de ntreda ie da giapé pra la cassa y danora tl ufize dla Lia per l Turism de Urtijëi.

Lumen
N ucajion de si 100 ani mët la Mujiga de Sëlva a jì n cunzert da d’ansciuda, n dumënia ai 6 de auril dala 20:00 tla dlieja de Sëlva
Ntan l cunzert pude­ràn scuté su pec de cumponisć coche Gu­stav Mahler, Marc van Delft, Karl Jenkins y mo trueps d’autri. La meludies sentimenteles dëssa vester n lecort di plu biei mumënc dla lia ti ultims cënt ani y l unirà nce sunà n pez n unëur di cu­mëmbri defonc.
Duc i apasciunei ie nviei de cuer.

Cunzert da d’ansciuda
N dumënia ai 6 de auril dala 10:30 nvieia la Mujiga de Urtijëi via – tla Cësa di Cungresc a Urtijëi – si sajon de mujiga per l ann 2025
L dirighënt Egon Lardschneider à cris ora nce chëst ann n prugram drët nteressant. Tla prima pert dl cunzert puderàn audì cum­posizions tlassiches coche »Festivus Fanfare« de Martin Scharnagl, la Ouvertüre »Dichter und Bauer« de Franz von Suppè y la »Polka Italienne» de Sergei Rachmaninoff. Per stlù ju la prima pert uniràl mo prejenta »Edler Magellan» de Josef Stein­bacher arr. Andreas Winkler.
Tla segonda pert vàla inant cun mujiga plu moderna. I musicontri à mparà ite »A vision of the first light» de Satoshi Yagisawa, »Mam­ma mia the musical« de Anderson/Ulvaeus Abba y »La Primitiva» de Jef Penders. Per finé via uniràl sunà »Der Märchenkönig« de Timo Dellweg. La Mujiga de Urtijëi se ncunforta sun vosc unì y mbincia n bon scuté su.

Sëira leterera 
n con’ dla mostra 
»L tier te mé«
N juebia ai 10 de auril, dala 20:30, vëniel metù a jì tla galaria 
Vijion a Puntives na sëira leterera 
n con’ dla tematica dla mostra 
atuela »l tier te mé«
Cun la curnisc de opres d’ert dla doi artistes Valentina Andrees Reschtizka y Emily Oberschmied, saràl n juebia ai 10 de auril da audì la poetësses Nadia Rungger y Rut Bernardi y l poet Jörg Zemmler, che jirà ite sun l liam parentà che la persona à cun l tier. Se render cont dla carateristiches dl tier che purton te nëus, possa nes giaurì a manieres de pensé y de cunvivënza nueves.
Duc ie de cuer nviei a uni a chësta sëira pra n bon got de vin y vel’ pez de mujiga.